Унагъом и Илъэс епхыгъэу Урысые зэнэкъокъоу «Гъогу щынэгъончъэр кIэлэцIыкIухэм апай» зыфиIорэр Урысыем хэгъэгу кIоцI IофхэмкIэ и Министерствэрэ просвещениемкIэ и Министерствэрэ зэгъусэхэу зэхащэ.

Зэнэкъокъум унэгъо командэ анахь дэгъур къыщылъэгъощт, зэрагъэнафэрэмкIэ, ар илъэс къэс рагъэкIокIыщт.
Мы зэнэкъокъур Урысыем цIыфыбэ зыхэлэжьэрэ хъугъэ-шIэгъэшхомэ ащыщ, гъогум щынэгъончъэу зэрэщызекIощтхэр ашIэным, кIэлэеджакIохэм культурэу, интеллектуальнэ-творческэ сэнэущыгъэу ахэлъым зегъэушъомбгъугъэным ыкIи гъогурыкIоным ишапхъэхэр агъэцэкIэнымкIэ пшъэдэкIыжьэу ахьырэр агурыгъэIогъэным афэIорышIэщт.
Художественнэ творчествэм ыкIи гуманитар технологиехэм хэхъоныгъэ ашIынымкIэ Урысые гупчэр зэнэкъо­къум иоператор.
Едзыгъуи 7-кIэ анахь дэгъухэр къыхахыщтых: кино ыкIи анимационнэ кино; орэдкъэIоныр; медиа; сурэтшIыгъэр ыкIи плакатыр; комиксхэр; джэгукIэр; просветительскэ проектыр.
Зэнэкъокъум хэлэжьэнхэу рагъэблагъэх кIэлэеджакIохэу илъэси 8 — 18 зыныбжьхэр ыкIи ны-тыхэмрэ кIэлэцIыкIухэмрэ якомандэхэр, нэмыкIэу уна­гъом исхэри хагъэхьанхэ алъэкIыщт.
IофшIагъэхэр 2024-рэ илъэсым Iоныгъом и 2-м къыщегъэжьагъэу и 30-м нэс цифрэ платформэу https://bdd-rus.ru/ агъэхьын алъэкIыщт.
Чъэпыогъум и 1-м къыщегъэжьагъэу и 15-м нэс лъэныкъо зэфэшъхьафхэмкIэ экспертхэм ахэм уасэ къафашIыщт.
Зэнэкъокъум фэгъэхьыгъэ игъэкIотыгъэ къэбарыр ыпшъэкIэ зигугъу къэтшIыгъэ федеральнэ гупчэм иофициальнэ сайт ижъугъотэщт: https://vcht.center/events/bdd/bezo­pasnaya-doroga-detyam/.
НэкIубгъор зыгъэхьазырыгъэр
Iэшъынэ Сусан.