Кушъхьэфэчъэ спортымкIэ къэралыгъом ичемпионатрэ ипервенствэрэ, джащ фэдэу Урысые зэнэкъокъухэр къалэу Омскэ щыкIуагъэх. Адыгэ Республикэм испортсменкэхэм джэрз медальхэр къафагъэшъошагъэх.

ХагъэунэфыкIырэ чIыпIэр шъолъырым къыфэзыхьыгъэхэр Анастасия Могилевскаямрэ Диана Гейкорэ. Ахэм илъэс 19 – 22-рэ зыныбжь­хэм якуп зыщаушэтыгъ, ахэр къызэдэчъэнэу «Медисон» зыфиIорэм хэлэжьагъэх. Мы лъэныкъом командэр нэбгыритIумэ къыщагъэлъагъо, эстафетэр зэIэпахызэ адрэ спортсменкэхэм янэкъокъух.
Урысыем ипервенствэ текIоныгъэр къыщыдэзыхыгъэхэр Москва къикIыгъэхэ Софья Балаевамрэ Ирина Мурзинамрэ. ЯтIонэрэ хъугъэх Тульскэ хэкум илIыкIохэу Дарья Ермоловамрэ Анна Смирновамрэ.