Урысыем ижурналистхэм я Союз исекретарэу Роман Серебряным Адыгеим икъэбарлъыгъэIэс амалхэм апае десэхэр зэхищэгъагъэх.

АР-м лъэпкъ IофхэмкIэ, Iэ­кIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Ко­митет Iофтхьабзэм изэхэщэн кIэщакIо фэхъугъ.
Комитетым итхьаматэу Шъхьэ­лэхъо Аскэр пэублэ гущыIэр къызешIым журналистикэр уахътэм диштэу лъыкIотэрэ сэ­нэхьатхэм зэращыщыр хигъэу­нэфыкIыгъ. Непэрэ уахътэм гъэзетхэми, радиоми, телевидениеми апэ ишъырэр социальнэ хъытыухэр ары. Ащ къы­хэкIэу журналистхэм яIофшIэн шIыкIэ-амалыкIэхэр зэрэща­гъэфедэн фаер уахътэм нэ­ры­лъэгъу къызэришIырэр, ащ фэ­гъэхьыгъэ шIэныгъэхэр журналистхэм икъоу къызIэкIагъэ­хьанхэм пылъынхэ зэрэфаер къыIуагъ.
Джащ фэдэу АР-м хэгъэгу кIоцI IофхэмкIэ и Министерствэ ипресс-къулыкъу ипащэу Гъомлэшк Байзэт зэIукIэгъум хэлэжьагъ. Шъолъырым икъэбарлъыгъэIэс амалхэм Iоф зэрадашIэрэм ащ игугъу къышIыгъ. Сыд фэдэ хъугъэ-шIагъэ къэ­хъугъэми къэбарыр апэу къызэратыщтым лъымычъэхэу, шъыпкъагъэ хэлъэу къыраIотыкIыныр журналистхэм япшъэ­рылъэу зэрэщытыр ащ хигъэу­нэфыкIыгъ. ТелефонкIэ цIыфхэр зыгъапцIэхэрэм япчъагъэ нахьыбэ зэрэхъугъэм, ащ фэдэ бзэджашIэхэм зарамыгъэгъэделэным пае пстэури сакъынхэ зэрэфаем афэгъэхьыгъэ материалхэр журналистхэм къагъэ­хьазырынхэм мэхьанэшхо зэриIэр къыIуагъ. Ежь зипэщэ къулыкъум иамалхэмкIэ Iэпы­Iэгъу зэрафэхъущтхэр къыкIигъэтхъыгъ. Гъомлэшк Байзэт иеплъыкIэкIэ, радиом, телевидением ыкIи гъэзетхэм ачIыпIэ социальнэ хъытыухэр иуцонхэ алъэкIыщтэп, ау ахэм яIэ хъугъэ социальнэ нэкIубгъохэр IофшIэнымкIэ Iэрыфэгъоу къыз­фагъэфедэнхэ фае.

Къэралыгъо пабликхэм Iоф зэрашIэрэм, медиа зэфэшъхьафхэм зэрадэлажьэхэрэм афэгъэхьыгъэу зэхахьэм къыщыгущыIагъ АР-м шъолъыр гъэIорышIэнымкIэ и Гупчэ ипа­щэу Къоджэшъэо Казбек. Къэ­бар жъугъэм иамал зэфэ­шъхьафхэм ясоциальнэ хъы­тыухэм эфир занкIэхэр аща­гъэфедэнхэ зэралъэкIыщтыр ащ къыIотагъ ыкIи ар непэрэ уахъ­тэм диштэрэ шIыкIэ-амалышIоу къыхигъэщыгъ.
Социальнэ хъытыухэм афэгъэзэгъэ журналистхэм япшъэ­рылъхэр зэрагъэцэкIэн фаем, нейросетим игъэфедэн епхы­гъэу яIофшIэн зэрэзэхащэн алъэкIыщт шIыкIэ-амалыкIэхэм къатегущыIагъ Урысыем ижурналистхэм я Союз исек­ретарь. Хъугъэ-шIагъэр кIэкIэу, зэрэхъугъэм лъыпытэу къызэрэрагъахьэрэм къыхэкIэу цIыфхэм социальнэ хъытыур къыхахы. Щысэ къызэрыкIохэр къыхьызэ, десэ къэгъэлъэгъонхэм журналистэу къекIолIа­гъэхэр ахигъэлажьэхэзэ Роман Серебряным исеминар гъэшIэгъонэу зэхищагъ.
Текстхэм, мэкъамэхэм ятхын­кIэ, нейросетир гупчэ къэбарлъыгъэIэс амалхэм зэра­гъэфедэрэр Роман къыIотагъ. Ау цIыфым фэдэу творческэ гу­пшысэныр иамал къызэримыхьыщтыр хигъэунэфыкIыгъ.
Журналистым иIэпэIэсэныгъэ, изэфэхьысыжь акъыл хъытыур джырэкIэ текIон ылъэ­кIырэп. Арышъ, амалыкIэхэр къызфа­гъэфедэхэзэ къэбар­лъыгъэIэс амалхэр ыпэкIэ лъы­кIотэнхэ фае.
Тэу Замир.