Федеральнэ проектэу «Урысыем ицIыфхэм яхэгъэгу шIу алъэгъоу пIугъэнхэр» зыфиIорэм къыдыхэлъытэгъэ зэнэ­къокъоу «Сабыигъом инавигаторхэр» зыцIэр гъэрекIо щегъэжьагъэу Теуцожь районым ща­гъэцакIэ. Лъэпкъ проектэу «Гъэсэныгъэм» ар епхыгъ.

КIэлэеджакIохэм япIункIэ ыкIи кIэлэцIыкIу общественнэ организациехэм Iоф адэшIэ­гъэнымкIэ Теуцожь районым ит гъэсэныгъэм иучреждении 8-мэ япащэхэм упчIэжьэгъухэр афашIыгъэх. Ахэр Пэнэжьыкъое гурыт еджапIэу N 1-мкIэ ХьацIэцIэ Сусанн, Аскъэлэе гурыт еджапIэу N 2-мкIэ Еутых Хъарет, ПчыхьалIыкъое гурыт еджапIэу 3-мкIэ ЛIыхъурэе Зар, Гъобэкъое гурыт еджа­пIэу N 6-мкIэ Хъут Эмм, Джэджэхьэблэ гурыт еджапIэу N 7-мкIэ Хъут Мадин, Нэшъу­къое гурыт еджапIэу N 8-мкIэ Лъэцэр Ирин, Очэпщые гурыт еджапIэу N 9-мкIэ Нэхэе Марзиет, Лъэустэнхьэблэ гурыт еджапIэу N 10-мкIэ ЯхъулIэ Саид. ШэпхъакIэхэм адиштэу яIофшIэн джы ахэм агъэцакIэ, нэбгырэ пэпчъ кIэлэеджа­кIохэмкIэ упчIэжьэгъух, шIэныгъэу аIэкIэлъхэмкIэ адэгуащэх.
ГукIэгъу, гукъэбзэныгъэ зы­хэлъ, зисэнэхьат фэшъыпкъэ кIэлэегъаджэхэр ары сабыигъом инавигатор хахьэхэрэр.
Гурыт еджапIэхэм япащэхэм яупчIэжьэгъухэм IофшIэнэу агъэцэкIагъэр зыщызэфахьысыжьыгъэ Iофтхьабзэ зэхащэгъагъ, илъэсым къыкIоцI пшъэ­рылъэу зэшIуахыгъэхэм ахэр къатегущыIагъэх, ягъэхъагъэхэр къагъэлъэгъуагъэх ыкIи илъэсыкIэ еджэгъум анахьэу анаIэ зытырагъэтыщт лъэныкъохэр къагъэнэфагъэх.
Iофтхьабзэм хэлэжьагъэх Теуцожь районым гъэсэны­гъэмкIэ игъэIорышIапIэ ипащэу Гедыоджэ Казбекрэ районым икIэлэцIыкIу гупчэ ипащэу Хьа­джэбыекъо Фатимэрэ. Пащэхэм яупчIэжьэгъухэм яIофшIэн зэрэзэхащагъэм ахэм уасэ фашIыгъ.
КъыткIэхъухьэрэ лIэужхэм шэпхъэшIухэм адиштэрэ гъэсэныгъэ ягъэгъотыгъэныр пшъэрылъ шъхьаIэхэм ащыщ. ЯцIыкIугъом къыщегъэжьагъэу шIушIэ Iофтхьабзэхэм ахэлэжьэнхэм ахэр фагъасэх.
Шэуджэн Марин.