ПсэупIэу приватизацие шIыгъэр зэшъхьэгъусэхэм къызэдалэжьыгъэ мылъкухэм ахахьэмэ къызэхэтфымэ тшIоигъуагъ.

УФ-м и Унэгъо кодекс ия 34-рэ ­статья къызэрэщиIорэмкIэ, зэшъхьэгъусэхэр зыщызэготхагъэхэм къыщыублагъэу зэдагъотыгъэ мылъкур къызэдалэжьыгъэкIэ макIо. Ащ IофшIапIэм Iутэу е бизнесым пылъэу нэбгырэ пэпчъ гъотэу иIагъэм, иакъылкIэ къыгъэхъагъэм, пенсиеу е пособиеу къыфэкIуагъэм къыщегъэжьагъэу, нэмыкI ахъщэу къаIэкIэхьагъэм нэсыжьэу къыхеубытэ.
КъызэдалэжьыгъэкIэ макIох ягъот зэхэлъэу амыгъэкощырэ ыкIи агъэкощырэ мылъкум хахьэхэрэр, «тхьэпэ лъапIэхэр», чIыгу Iахьхэр, къызэтенэным е хахъо фэхъуным пае банкым ратыгъэ ахъщэхэр (вклады). ЗэшъхьэгъуситIум язэу мылъкур къэзыщэфыгъэм е зы­тетхагъэм, ахъщэр банкым езытыгъэм мыщ дэжьым мэхьанэ щыриIэп.
Арэу щытми, ахэм ахэмыхьэхэрэри щыIэх. ГущыIэм пае, тIумэ яз шIухьафтын къыфашIыгъэр е цIыфэу щымы­Iэжьым къыкIэныгъэу къытефэжьыгъэр. Унэу приватизацие шIыгъэри зэшъхьэгъуситIум язэу ар зыгъэпсыгъэр ары зиунае хъурэр. Ащ ишIэ хэмылъэу, фитыныгъэ къымытыгъэу ар зыгорэм ыштэн е фагъэзэн алъэкIыщтэп.