Джэджэ районым ит къутырэу Курскэр гъэстыныпхъэ шхъуантIэр зэмыщэлIэгъэ псэупIэ макIэу Адыгеим къинагъэхэм ащыщыгъ. Джырэблагъэ а сатырэм ар хэкIыжьыгъ.

Iахьзэхэлъ обществэу «Газпром газораспределение Майкоп» зыфиIорэм къызэритыгъэмкIэ, мы псэупIэм газыр ращалIи, километри 5 хъурэ кIуапIэхэр щагъэпсыгъэх. Джы УФ-м и Президентэу Владимир Путиныр кIэщакIо зыфэхъугъэ «социальнэ догазификацием» къыдыхэлъытагъэу ар щагухэм аращалIэ.
Программэм къызэрэдыхэлъытагъэмкIэ, щагум зэрэнагъэсырэм ыпкIэ хэ­лъэп, ау бысымхэм акIуачIэкIэ унэхэм араща­лIэ ыкIи ащызэбгыращыжьы. Ащ фэдэу унэм езыщэлIэгъэ апэрэ унагъом блэкIыгъэ тхьамафэм мэфэкI шIыкIэм тетэу гъэстыныпхъэр фатIупщыгъ.

Мы къутырымкIэ «догазификацием» къыдыхэлъытагъэу ищагу фыращэлIэнэу зэзэгъыныгъэм зыдыкIэтхагъэхэр унэгъо 19 мэхъу. ПстэумкIи Адыгэ Республикэм зэзэгъыныгъэ мини 10,5-рэ щашIыгъ. Ахэм ащыщэу мини 9,3-мэ ячIыгу Iахь гъунэхэм газыр анагъэсыгъ, унэ мини 3,7-мэ ащатIупщыгъ.
ХЪУТ Нэфсэт.