2023-рэ илъэсым Адыгеим инвестициеу къыхалъхьэрэр сомэ миллиард 61,6-м нэсыгъ, 2024-м республикэм имылъку шъхьаIэ сомэ миллиард 28,5-рэ къыхэхъуагъ.

Мы уахътэм проект 34-рэ шъолъырым щыпхыращы, ахэм пстэумкIи сомэ миллиард 82,2-рэ инвестициеу къакIэкIощт. Экокурортэу «Лэгъонакъэрэ» Тэхъутэмыкъое районым щагъэпсырэ промышленнэ паркымрэ анахь иных. Ахэм экономикэм хэхъоныгъэшхохэр рагъэшIыщтых, IофшIэпIэ чIыпIэхэм мымакIэу къахэ­хъощт.
АР-м и ЛIышъхьэ ипресс-къулыкъу къызэрэхигъэщыгъэмкIэ, шъолъырым инвестиционнэ шэпхъэ гъэнэфагъэхэр зэриIэхэм ишIуагъэкIэ мы лъэныкъомкIэ Iофхэр хэпшIыкIэу нахьышIу хъугъэх, тапэкIэ гугъэпIэ инхэр къэзытырэ пшъэрылъхэр агъэцакIэх.
Ащ нэмыкIэу, инвестиционнэ проектхэр пхырыщыгъэнхэм фэшI ащ ищыкIэгъэ инфраструктурэр Адыгеим егъэпсы, инвесторхэм IофшIэкIэ амалышIухэр ятыгъэнхэм, хэбзэIахьхэмкIэ фэгъэкIотэнхэр яIэнхэм дэлажьэ. Джащ фэдэу инвестициехэр къыхэзылъхьагъэхэм хэбзэIахьэу атырэм щыщэу къызэрагъэгъэзэжьыщтыр процент 70-м нагъэсын гухэлъ яI.
— Тэ етхьыжьэгъэ гухэлъхэр дгъэкIэжьхэмэ, Владимир Путиным пшъэрылъэу къыгъэуцу­гъэхэр дгъэцакIэхэзэ, тишъолъыр инвесторхэмкIэ нахь хъопсагъо шIыгъэным тапэкIи ыуж титыщт. Джыдэдэми инвесторхэм яегъэжьапIэ афэгъэпсынкIэгъэным тыпылъ. ГущыIэм пае, проект пэпчъ тхылъэу ищыкIагъэхэр зы чIыпIэм щагъэпсынхэу амал яI, нэмыкI Iофэу пылъхэм язэшIохынкIэ пIалъэхэр дгъэкIэкIыгъэх, фэгъэ­кIотэнхэр ятэтых, ящыкIэгъэ инфраструктурэр тэгъэпсы. А IофшIэнхэр экономикэм хэхъоныгъэ егъэшIыгъэным, шъолъырым изегъэушъомбгъун афэIорышIэх. Ащ ишIуагъэкIэ IофшIэпIэ чIыпIэхэр нахьыбэ хъущтых, цIыфхэм гъотэу яIэм хэхъощт, хэбзэIахьхэр нахьыбэу къатыщтых, социальнэ пшъэрылъхэм ягъэцэкIэн ахэр пэIухьащтых, — къыIуагъ КъумпIыл Мурат.