Iоныгъом и 10-м къыщегъэ­жьагъэу и 30-м нэс Урысые кIэлэцIыкIу гупчэу «Орлен­кэм» я ХХ-рэ хэушъхьафыкIыгъэ сменэу «Юный математик» зыфиIорэр щыкIощт.

Республикэ естественнэ хьисап еджапIэм щеджэрэ нэбгыри 9 ащ хэлэжьэщт. Ахэр Алексей Демченкэр, Роман Кузнецовыр, Максим Маруда, Даниил Матвеевыр, Марьям Мкртумовар, Алексей Неопрятнэр, Степан Таджимухамедовыр, Григорий Саакян, Глеб Стеблиныр.
ШIэныгъакIэхэр ныбжьыкIэхэм ягъэ­гъотыгъэнхэм Iоф зэрэдашIэщтыр, хьисапым ылъэныкъокIэ гъэхъэгъэшIухэр ашIынхэм зэрэфагъэсэщтхэр къыщаIуагъ республикэ естественнэ хьисап еджапIэм. Сменэм ипрограммэ къыдыхэлъытагъэу хьисап джэгукIэхэр, я ХIХ-рэ Къыблэ хьисап турнир, хьисап еджапIэ, гуманитар ыкIи естественнэ шIэныгъэхэмкIэ лекцие зэфэшъхьафхэр афызэхащэщтых. Джащ фэдэу ныбжьыкIэхэр агъэчэфыщтых ыкIи япсауныгъэ зыпсыхьэрэ Iофтхьэбзэ зэфэшъхьафыбэ афызэхащэщтых.
Сменэм игъэсэныгъэ программэ къыдыхэлъытагъэу хьисапымкIэ кIэлэегъэджэ пэрытхэр, шIэныгъэлэжь ушэтакIохэр, хьисапымкIэ Урысыем илъэпкъ командэ итренерхэр, мы предметымкIэ, экономикэмкIэ ыкIи лингвистикэмкIэ Урысые олимпиадэ­хэм яосэшIхэр къырагъэблэгъэщтых.