КIэлэпIупкIэр игъом зымытыхэрэм язекIуа­кIэ зэрэмытэрэзыр агурыгъэIогъэным, зытефэхэрэм пшъэдэкIыжь пхъашэ ягъэхьыгъэным хьыкум приставхэм анаIэ атет.

Пшъэрылъхэр гъэцэкIагъэхэ зэрэхъухэрэм ежь ышъхьэкIэ лъэплъэ республикэм ихьыкум пристав шъхьаIэ. Хэбзэгъэуцугъэм мы лъэныкъомкIэ къыдилъы­тэхэрэ шапхъэхэр агъэлъэшыгъэх, ны-тыхэу зипшъэ­рылъхэр зымыгъэцакIэхэрэм уголовнэ Iофхэр къапагъэтаджэхэу къыхэкIы. Ащ Iофыр нэшъумыгъэсэу, чIыфэр игъом ыкIи икъоу шъутынэу хьыкум приставхэр къышъоджэх.
Мыщ епхыгъэу хьыкум приставхэм я Федеральнэ къулыкъу и ГъэIорышIапIэу Адыгэ Республикэм щыIэм ренэу Iофтхьэбзэ зэфэшъхьафхэр зэхещэх. ЧIыфэхэр къаIыхыжьыгъэнхэм пае зипшъэрылъхэр зымыгъэцакIэхэрэ ны-тыхэм адэжь хьыкум приставхэр макIох, ахэм адэгущыIэх, язекIуакIэ зэрэмытэрэзыр агурагъа­Iо. Сабыим ипIункIэ хэбзэгъэуцугъэм къыгъэнафэрэ лъэныкъохэр зымыгъэцакIэхэрэм административнэ пшъэдэкIыжь зэрахьыщтым дакIоу, уголовнэ Iофи къафызэIуахын зэралъэкIыщтыр араIо.
Джащ фэдэу кIэлэпIупкIэр зымытыхэрэр охътэ гъэнэфагъэм къэралыгъом икIынхэ зэрэфимытхэм афэгъэхьыгъэ унашъохэр ашIых, административнэ хэбзэукъоныгъэ зэрашIыгъэмкIэ протоколхэр зэхагъэу­цох, уголовнэ Iофхэр къафызэIуахых, нэмыкIыбэ зэшIуахы. Мы лъэбэкъухэм пшъэрылъэу яIэр зы — сабыйхэм къатефэрэ ахъщэр игъом ыкIи бырсыр къыпымыкIэу ны-тыхэм къатыныр ары.
Мыщ епхыгъэ IофшIэныр хьыкум приставхэм тапэкIи лъагъэкIотэщт, зыныбжь имыкъугъэхэм яфитыныгъэхэр къэухъумэгъэнхэм анаIэ тырагъэтыщт.
Хьыкум приставхэм я Федеральнэ къулыкъу
и ГъэIорышIапIэу АР-м щыIэм ипресс-къулыкъу.