Тигъэзет къызэрэхиутыгъэу Брянскэ хэкум итеннисист ныбжьыкIэхэр Мыекъуапэ щыIагъэх. Ахэм егъэджэн ыкIи зыгъэсэн Iофтхьабзэхэр афызэхащагъэх.

Мы пстэуми финал едзыгъо афэхъугъ Адыгеим икъэлэ шъхьаIэ, Брянскэ ыкIи Курскэ хэкухэм яспортсменхэр зыхэлэжьэгъэхэ зэнэкъокъур. Судейскэ коллегием пэщэныгъэ дызэрахьагъ командэхэм ятренерхэм. Зызыушэты­хэрэр купищэу гощыгъагъэх, кIалэхэр ыкIи пшъашъэхэр шъхьа­фэу зэнэкъокъугъэх.
ЗэхэщакIохэм зэрагъэнэфагъэу, «апшъэрэ лигэм» хэхьагъэх гъэ­хъэгъэшIу зиIэ теннисистхэр. Ащ текIоныгъэр къыщыдахыгъ Курскэ хэкум щыщ Данил Дьяченкэмрэ Брянскэ хэкур къэзыгъэлъэгъогъэ Ксения Макаровамрэ. «Апэрэ лигэм» ащытекIуагъэх Брянскэ хэкум илIыкIоу Егор Медведевымрэ Мыекъуапэ щыщ Ирина Славновамрэ. «ЯтIонэрэ лигэм» текIоныгъэр къыщыдахыгъ Курскэ хэкум испортсменэу Иван Шмакинымрэ Мыекъуапэ щыщ Пэфыф Суандэрэ. ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм дипломхэр ыкIи медальхэр афагъэшъошагъэх.