ГандболымкIэ Урысыем ичемпионат и Суперлигэ хэт «АГУ-Адыифым» илъэсыкIэ лъэхъа­ным къыдыхэлъытэгъэ апэрэ ешIэгъоу иIагъэр шIуахьыгъ.

«АГУ-Адыиф» — «Черноморочка» — 25:37 (12:19).
ХьакIэхэр нахь лъэшэу ешIагъэх. Ахэм нахь къахэщыгъэх ыпэкIэ тикомандэ хэтыгъэхэ Да­рина Никулинар, Дарья Вигуржинскаяр ыкIи Елена Стрель­цовар. Мы нэбгырищым гъогогъу 14-рэ къэлапчъэм Iэгуаор дадзагъ.
«АГУ-Адыифым» щешIэгъэхэ Къэбжь Заремэрэ Ксания По­номаревамрэ гъогогъу тфырытфэ, капитанэу Кобл Зуретэ гъогогъуи 4 къэлапчъэм Iэгуаор дадзагъ.
— Дэгъоу тешIагъ. Непэ тыз­­IукIэгъэ командэм блэкIыгъэ зэнэкъокъум я 4-рэ чIыпIэр къы­щыдихыгъ. Суперлигэм иешIэгъу­хэм языфэгъэхьазырын фыте­гъэпсыхьэгъэ турнирэу Москва щыкIуагъэм ифинал «ЦСКА-м» щыIукIагъ ыкIи ащ къышIуихьыгъ. Тикомандэ гандболисткакIэхэр къыхэхьагъэх, гъэхъа­гъэхэр тшIынхэм фэшI ахэр зэсэнхэ фае, — къыIуагъ «АГУ-Адыифым» итренер шъхьаIэу Наталья Дерепаскэм.
Апэрэ турым къыдыхэ­лъытэгъэ ешIэгъухэм язэфэхьысыжьхэр:
«Кубань» — «Динамо-Синара» — 24:24, «Луч» — «Астраханочка» — 26:28, «Звезда» — «Ростов-Дон» — 26:42.
Адыгеим икомандэ къыкIэлъы­кIощт ешIэгъур Iоныгъом и 12-м Астрахань щыриIэщт.