Гъот макIэ зиIэ унагъохэу кIэлэцIыкIухэр зэрысхэм ыпкIэ хэмылъэу анахь ящыкIэгъэ пкъыгъохэр къазыщаратыщт къулыкъоу «Пункт проката» зыфиIорэм иIофшIэн Мыекъуапэ щыригъэжьагъ.

Ар зыщагъэпсыгъэр цIыфхэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэу Мыекъуапэ дэтыр ары. АР-м и ЛIышъхьэу КъумпIыл Мурат иуна­шъокIэ ар гъэцэкIагъэ хъугъэ.
Сабыибэ зэрыс унагъохэм ыкIи зи­гъот макIэхэм яфэныкъуагъэхэр дэгъэзыжьыгъэнхэмкIэ социальнэ IэпыIэгъоу респуб­ликэм аригъэгъотырэм зэрэхигъэхъощтым пылъ. А амалхэр зэкIэ зыфэIорышIэхэрэр цIыфышъхьэ пчъагъэм хэгъэхъогъэныр ары.
— Адыгэ Республикэм сабыеу къы­щыхъурэ пчъагъэм хэ­гъэхъогъэнымкIэ программэу 2023 — 2025-рэ илъэс­хэм ателъытагъэм къызэрэщыдэлъытагъэу, министрэхэм я Кабинет ышIыгъэ унашъом тетэу къулыкъоу «Пункт проката» зыфиIорэр агъэпсыгъ. Мы фэIо-фашIэр сабый зиIэу, зигъот мэкIэ унагъо­хэм атегъэпсыхьагъ. ЗэшIокI зимыIэ унагъохэм ясабыйхэм япIункIэ анахь ящыкIагъэхэр агъотынымкIэ мыр амалышIоу щыт. Ахэр зымыщэфышъущтхэм «Пункт проката» зыфи­Iорэм зыкъыфагъэзэнышъ, сабыир илъэсищ ныбжьым нэсыфэ ищыкIэгъэщтыр ыпкIэ хэмылъэу къыIахын алъэкIыщт. Апэ мэзих пIалъэкIэ зэзэгъыныгъэм адыкIэтхэх, джыри ящыкIагъэ зыхъукIэ, нэужым ар лъагъэкIуа­тэ. Мы IэпыIэгъур игъо шъыпкъэу щыт, сыда пIомэ а пкъыгъохэр зэкIэ къэпщэфынхэр непэ лъапIэх. Сабыим ищыкIагъэхэр ыпкIэ хэмылъэу унагъо­хэм агъотышъу хъумэ, ящыIэныгъэ ащ къызэригъэпсынкIэщтым сицыхьэ телъ, — хигъэу­нэфыкIыгъ Мыекъуапэ дэт Зэхэубытэгъэ гупчэм ипащэу Артур Казиновым.

ТигущыIэгъу къызэриIуагъэмкIэ, пкъы­гъоу мы къулыкъум чIагъотэщтхэм ащыщых (къэхъугъакIэхэм къащегъэжьагъэу илъэсищ зыныбжьхэм анэсэу) курэ­жъые зэфэшъхьафхэр, сабый гъолъыпIэр, зыщы­зэблахъурэ Iанэр, кIоныр езыгъэжьэгъа­кIэхэр зэрагъэуцохэрэр, автомобилым рагъэуцорэ хэушъхьафыкIыгъэ тIысыпIэхэр, нэмыкIхэри. Къыхэгъэщыгъэн фае сабыйхэр апIунымкIэ анахь ящыкIагъэу мы къулыкъум чIэтхэр зэкIэ кIэу къызэра­щэфыгъэхэр. Ащ пае республикэ бюдже­тым сомэ мин 700-м ехъу къыхагъэ­кIыгъ. Джыри тапэкIэ ащ къыщымыуцухэу, за­къыфэзыгъэзэщт нэбгырэ пчъагъэм елъытыгъэу, «Пункт проката» зыфиIорэм чIэт пкъыгъохэм ахагъэхъон гухэлъ яI.
IэпыIэгъу зищыкIагъэу къулыкъум зыкъыфэзыгъэзэгъэ Милана Тулумджьян гущыIэгъу тыфэхъугъ.
— Мыщ фэдэ пункт къызэрэзэ­Iуахыгъэр синэIосэ бзылъфыгъэм къысиIуагъ. Ащ лъэшэу сигъэгушIуагъ, сыда пIомэ зигъот мэкIэ, шъхьэзэкъо ныхэм сащыщ. СикIэлэцIыкIу илъэсныкъом къе­хъугъ, курэжъые къыфэсщэфы­шъунэу амал сиIагъэп. Джы а щыкIагъэр дэгъэзыгъэ хъугъэ мы къулыкъум ишIуагъэкIэ. Сэщ фэдэхэмкIэ IэпыIэгъушIу дэд, — зэрэразэр къыхигъэщызэ къытиIуагъ Миланэ.
КъэIогъэн фае, мыщ фэдэ IэпыIэгъу зимыщыкIэгъэ унагъохэм ащапIурэ кIэлэцIыкIухэм амыгъэфедэжьырэ пкъыгъоу къафанэхэрэр мы гупчэм рахьылIэнхэ алъэкIыщт.
Iэшъынэ Сусан.