Адыгэ къуаем и Мафэ блэкIыгъэ зыгъэпсэфыгъо мафэхэм Дахъо гъэхъунэм щыхагъэунэфыкIыгъ. Ащ лъэпкъ зэфэшъхьафхэм къахэкIыгъэ нэбгырабэ зэфищагъэх.

Къуаем иIэшIугъэ ауплъэкIугъ хэу­шъхьафыкIыгъэ дзэ операцием хэлэжьагъэхэм ащыщхэм ыкIи ахэм яунагъохэм арысхэм. Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ муниципальнэ образованиехэр иIэпыIэгъухэу мы Iофтхьабзэм ахэр къыращэлIэнхэ алъэкIыгъ. РеспубликэмкIэ дзэ операцием хэлэжьагъэхэм ыкIи ахэм яунагъохэм ащыщэу пстэумкIи нэбгырэ 200 фэдиз транспорт къафа­гъоти, фестивалым ащагъэх.
Творческэ купхэм къагъэхьазырыгъэ концертым ягуапэу еплъыгъэх, кIэлэцIыкIухэр зэнэкъокъухэм ыкIи джэгунхэм ахэлэжьагъэх. Джащ фэдэу лъэпкъ шэн-хэбзэ зэхэтыкIэхэм, культурэм аща­гъэгъозэнхэ алъэкIыгъ.