Адыгэ къэралыгъо университетым итхылъ тедзапIэ адыгабзэмкIэ Iоф зэрашIэщт тетрадь къыщыдагъэкIыгъ.

Адыгэбзэ грамматикэм фэгъэхьыгъэ егъэджэн программэу ар щыт, IэкIыб къэралыгъуабзэу ар зэзыгъэшIэщтхэм афытегъэпсыхьагъ. Зэхэзыгъэуцуагъэр филологие шIэныгъэхэмкIэ кандидатэу Долэ Рузанн. Программэу «Приоритетым» ипроектэу «Адыглэнд» зыфиIорэм къыдыхэлъытагъэу тетрадыр къыдагъэкIыгъ.
Адыгэ грамматикэмкIэ пэублэ шIэныгъэхэм ар афытегъэпсыхьагъ. Грамматическэ материалхэр, гъэцэкIэжьынхэр, тхэн ыкIи зэрагъэшIагъэхэр зэрэкIаджыкIыжьыщт IофшIэнхэр, адыгабзэр зэрагъэшIэнымкIэ зишIуагъэ къэкIощт гъэцэкIэнхэр мыщ къыдэхьагъэх.
Тыркуем и Дюздже университет черкесыбзэмкIэ ыкIи культурэмкIэ иотделение адыгабзэр языгъэхьырэ кIэлэ­егъаджэхэм яIофшIакIэ тетрадым изэ­хэгъэуцонкIэ IэубытыпIэ ашIыгъ.
— Дюздже университетым тырку студентхэм Iоф ащыдатшIэ зэхъум, IэкIыб къэралыгъуабзэм фэдэу адыгабзэр зэ­гъэшIэгъэ­ным фытегъэпсыхьэгъэ тхы­лъыр къыдэдгъэкIынэу тыгу къэ­кIыгъ. Методикэу зэхэдгъэуцуагъэр тырку студентхэмкIэ тыушэтыгъ ыкIи ар дгъэфедэзэ, адыгэ грамматикэмкIэ тетрадь къыдэдгъэкIыгъ, урысыбзэ зышIэхэрэм ар афытегъэ­псыхьагъ, — къыIуагъ Долэ Рузаннэ.
Адыгэ къэралыгъо университетым адыгэ филологиемрэ культурэмрэкIэ ифакультет адыгабзэр зимыныдэлъфыбзэу щеджэрэ студентхэм бзэр зэрагъэ­шIэнымкIэ тетрадыр агъэфедэщт. Джащ фэдэу ежь-ежьырэу адыгабзэр зэзыгъа­шIэ зышIоигъохэми мыр IэпыIэгъу къа­фэхъущт.
Iоныгъом и 4-м къыщегъэжьагъэу и 8-м нэс Москва Гупчэ къэгъэлъэгъон комплексэу «Экспоцентр» зыфиIорэм кIэлэцIыкIу тхылъым фэгъэхьыгъэ я 2-рэ Московскэ дунэе ермэлыкъым тетрадым илъэтегъэуцо щыкIуагъ.
Адыгэ къэралыгъо университетым ипресс-къулыкъу.