ШышъхьэIу мазэм ыгузэгухэм оперативнэ-пэшIорыгъэшъ Iофтхьабзэу «Мак-24» зыфиIорэм иящэнэрэ едзыгъо Адыгеим щыкIуагъ. Ащ пшъэрылъэу иIагъэр хэбзэнчъэу агъэфедэрэ наркотик зыхэлъ веществохэр къезыгъэкIокIыхэрэр, зыгъэфедэхэрэр ыкIи зыщэхэрэр къыхэгъэщыгъэнхэр ары.

Iофтхьабзэм хахьэу Теуцожь районым уплъэкIун дэкIыгъо щыкIуагъ. Къутырэу Красненскэм иурамхэм ащыщ наркокъулыкъум иIофышIэхэм илъэс 37-рэ зыныбжь хъулъфыгъэр къыщаубытыгъ. Амыгъэунэфыгъэ веществор зыкIоцIыщыхьэгъэ къэмланыр ащ къы­хахыгъ.
АР-м хэгъэгу кIоцI IофхэмкIэ и Министерствэ иэксперт-криминалистхэм зэрагъэунэфыгъэмкIэ, хъулъфыгъэм къыIахыгъэр синтетикэ зыхэлъ наркотикэу къы­чIэкIыгъ.
Урысыем хэгъэгу кIоцI IофхэмкIэ и Министерствэ имежмуниципальнэ отделэу Адыгэкъалэ щыIэм бзэ­джашIэм уголовнэ Iоф къыфызэIуихыгъ. ЗэрагъэунэфыгъэмкIэ, хъулъфыгъэм илъэси 3-м нэс хьапс тыралъхьан алъэкIыщт.