Дзэ сэнэхьатхэр аIэ къызыщырагъэхьащт Гупчэ (ВУЦ) Мыекъопэ къэралыгъо технологическэ университетым къызэрэщызэIуахыгъэм фэгъэхьыгъэ зэIукIэм Адыгеим и ЛIышъхьэу КъумпIыл Мурат хэлэжьагъ.

Джащ фэдэу Iофтхьабзэм хэлэжьа­гъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м икъэралыгъо упчIэжьэгъоу, МКъТУ-м ипрезидентэу ТхьакIущынэ Аслъан, Урысыем и Лiыхъужъэу, АР-м и Парламент и Тхьаматэ игуадзэу, хэушъхьафыкIыгъэ дзэ операцием иветеранхэм я Ассоциацие Адыгэ РеспубликэмкIэ икъутамэ итхьаматэу Цэй Эдуард, Урысыем и Дзэ-космическэ кIуачIэхэм ягъэIорышIапIэ илIыкIохэр, МКъТУ-м ыкIи АКъУ-м яректорхэу Къуижъ Саидэрэ Мамый Даутэрэ, АР-м иветеранхэм я Совет, Адыгеим щыIэ дзэ частьхэм, АР-м идзэ комиссариат, Краснодар дэт апшъэрэ дзэ училищым ялIыкIохэр, юнармейцэхэр, общественнэ организациехэм ахэтхэр.
УФ-м и Правительствэ иунашъо диштэу мыщ фэдэ Гупчэр къызэIуахыгъ. Урысыем и УIэшыгъэ КIуачIэхэм къулыкъу ащызыхьыщтхэм дзэ ухьазырыныгъэ мыщ ащарагъэгъотыщт. Заказчикыр Урысыем и Ошъогу-космическэ кIуачIэхэм я Апшъэрэ командование ары.
МКъТУ-м истудентхэу курсант хъухэ­рэм сэнэхьатхэу «планерхэмрэ цIыф имысэу быбырэ пкъыгъохэмрэ ямеханик», «цIыф имысэу быбырэ пкъыгъом иоператор» зыфиIохэрэр илъэситIукIэ аIэ къырагъэхьащтых. Дзэ кафедрэм Iоф зэришIэрэ шапхъэхэм атетэу еджэнхэр зэхащэщтых. Мыщ фэдэ Гупчэр къэзыухыхэрэр дзэм къулыкъу щызыхьыгъэхэм афагъэдэщтых, званиехэр къаратыщтых. ЫужыкIэ ахэм хэбзэухъумэкIо къулыкъухэм Iоф ащашIэн алъэ— кIыщт.
Адыгеим и ЛIышъхьэ дзэ сэнэхьатхэр аIэ къызыщырагъэхьащт Гупчэр къызэрэзэIуахыгъэмкIэ апшъэрэ еджапIэм ипащэхэми, студентхэми къафэгушIуагъ.

«Хэгъэгум иапшъэрэ еджапIэхэм дзэ сэнэхьатхэр аIэ къызыщырагъэхьащт Гупчэхэр непэ къазэращызэIуахырэм къэралыгъом игъэпытэнкIэ мэхьанэшхо иI. Шъо зэрэшъушIэу, непэ Урысыем изыкъэухъумэжьын-промышленнэ комплекс псынкIэу хэхъоныгъэ ешIы. Ти УIэшыгъэ КIуачIэхэр джырэ шапхъэхэм адиштэу ауIэшых. Ащ епхыгъэу дзэ къулыкъур зыхьыхэрэм ухьазырыныгъэ дэгъу ягъэгъотыгъэн фае», — къыIуагъ КъумпIыл Мурат.
Джащ фэдэу зэIукIэм къыщыгущыIагъэх АР-м и Къэралыгъо Совет — Хасэм и Тхьаматэу Владимир Нарожнэр, Урысыем и Дзэ-космическэ кIуачIэхэм ягъэIорышIапIэ иотдел ипащэу Николай Перетятько, АР-м иветеранхэм я Совет и Тхьаматэу Къоджэ Аслъан, хэушъхьафыкIыгъэ дзэ операцием иветеранхэм я Ассоциацие ишъолъыр къутамэ итхьаматэу Цэй Эдуард, МКъТУ-м ипащэу Къуижъ Саидэ.
Республикэм и ЛIышъхьэ Гупчэм иаудиториехэр къыплъыхьагъэх, пащэхэмрэ курсантхэмрэ адэгущыIагъ.
МКъТУ-м къыщызэIуахыгъэ Гупчэм ипащэу Нурлан Самадьяновым еджэпIакIэм амалэу иIэхэм, курсантхэр зэрагъэхьазырыщтхэм, Юнармием, ДОСААФ-м, дзэ-патриотическэ объединениехэм, ветеранхэм я Совет, волонтерхэм зэдэлэжьэныгъэ зэрадыряIэщт шIыкIэм афэгъэхьыгъэу къафиIотагъ.
Гупчэм тир, компьютерхэр, проектор­хэр, цIыф имысэу быбырэ пкъыгъохэр ыкIи нэмыкIхэр зэриIэм, Урысые Федерацием зыкъэухъумэжьынымкIэ и Министерствэ инаучнэ гупчэ пэрытхэу гъэсэныгъэ языгъэгъотыхэрэм зэпхыныгъэ зэрадыряIэм, запасым щыIэ офицерхэм ащыщхэм дзэ дисциплинэхэм, топографием курсантхэр зэрафырагъэ­джэщтхэм ягугъу ащ къышIыгъ.
ЗэIукIэм икIэух Адыгеим и ЛIышъхьэу КъумпIыл Мурат джыри зэ МКъТУ-м къыщызэIуахыгъэ Гупчэм икIэлэегъа­джэхэми истудентхэми къафэгушIуагъ, еджэнми IофшIэнми гъэхъагъэхэр ща­шIынхэу къафэлъэIуагъ.
АР-м и ЛIышъхьэ
ипресс-къулыкъу къытыгъэ къэбархэмкIэ ЛIышэ Саныет.