Федеральнэ проектэу «Профессионалитетым» ишIуагъэкIэ Мыекъопэ къэралыгъо технологическэ университетым иполитехническэ колледж бэмышIэу къыщызэIуахыгъэ медицинэ кластерэу «ПрофиМед» зыфиIорэм Адыгеим и ЛIышъхьэу КъумпIыл Мурат щыIагъ.

Республикэм ипащэ кластерым иIофышIэхэмрэ истудентхэмрэ адыриIэгъэ зэIукIэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м псауныгъэр къэухъумэгъэнымкIэ иминистрэу Мэрэтыкъо Рустем, МКъТУ-м иректорэу Къуижъ Саидэ, АР-м гъэсэныгъэмрэ шIэныгъэмрэкIэ и Министерствэ илIыкIохэр.
Политехническэ колледжым ыпэкIи гурыт медицинэ IофышIэхэр зэрэщагъэ­хьазырыщтыгъэхэр къэIогъэн фае. МКъТУ-р федеральнэ проектэу «Профессионалитетым» игрант зэнэкъокъу зэращытекIуагъэм къыхэкIэу медицинэ кластерэу «ПрофиМедыр» зэхэщагъэ зэрэхъугъэм амалыкIэхэр ащ къыты­гъэх. Мыщ джыри фельдшер, мамыку, медсестра, лаборант, фармацевт сэнэхьатхэр зыIэ къыщизыгъахьэ зышIоигъохэр щырагъаджэх. Ау мылъкукIи, техникэкIи ар нахь зэтегъэпсыхьагъэ зэрэхъугъэм лъэ­шэу ишIуагъэ къэкIо. Гъэсэныгъэ языгъэгъотырэ организациищ, респуб­ликэм имедицинэ учреждение пэрыт 12 кластерым хэхьэ.

«Адыгеир непэ медицинэ IофышIэхэм афыщэкIэ. ТэркIэ мэхьанэ зиIэр тищыкIагъэм фэдиз IофышIэ зэредгъэджэщтым нэмыкIэу, цIыфхэми нахьышIоу медицинэ IэпыIэгъу арагъэгъотыныр ары. Тэ тызыфаер псауныгъэм икъэухъумэнкIэ зыфыщыкIэхэрэ IофышIэхэр дэгъоу рагъэджэнхэр, медицинэ учреждениехэм къуаджэхэм адэсхэми зэдэлэжьэныгъэ дэгъу адыряIэныр ары», — къыIуагъ КъумпIыл Мурат.
Гурыт медицинэ IофышIэхэм ягъэхьазырынкIэ, псауныгъэм икъэухъумэн фэгъэзэгъэ учреждениехэм яIофышIэхэм яIэпэIэсэныгъэ зыкъегъэIэтыгъэнымкIэ, гурыт, апшъэрэ гъэсэныгъэ зэрарагъэгъотырэ программэхэм атетэу рагъэ­джэ­рэ студент-медикхэм аттестациер ягъэкIугъэнымкIэ ищыкIэгъэ амалхэр зэкIэ «ПрофиМедым» зэриIэхэр МКъТУ-м ипащэхэм къаIуагъ.
КъумпIыл Мурат медицинэ кластерым амалэу иIэхэмкIэ студентхэмрэ кIэлэ­егъаджэхэмрэ къяупчIыгъ. Ахэм респуб­ликэм ипащэ джырэ шапхъэхэм адиштэу зэтегъэпсыхьэгъэ кабинетхэр, зэрэрагъэджэрэ тхылъхэр, медицинэмкIэ къулайныгъэ зэфэшъхьафхэр аIэ къырагъэ­хьанхэмкIэ къызфагъэфедэрэ пкъыгъохэр къырагъэлъэгъугъэх.
«ПрофиМедым» истудентхэм еджэныр къызаухкIэ медицинэм къызэрэхэнэжьыщтхэм, яIэпэIэсэныгъэ тапэкIи зэрэхагъэхъощтым, цIыфхэм яшIуагъэ зэрарагъэкIыщтым ицыхьэ зэрателъыр респуб­ликэм ипащэ къыIуагъ.
АР-м и ЛIышъхьэ ипресс-къулыкъу къытыгъэ
къэбархэмкIэ ЛIышэ Саныет.