Кушъхьэфэчъэ спортымкIэ зэнэкъокъу
Кушъхьэфэчъэ спортымкIэ я 32-рэ Урысые чемпионатэу «Темыр Кавказым ис лъэпкъхэм язэкъошныгъ» зыфиIорэр тыгъуасэ Мыекъуапэ къыщызэIуахыгъ.
Мыщ фэгъэхьыгъэ мэфэкI зэхахьэм къыщыгущыIагъ ыкIи Адыгеим и ЛIышъхьэу КъумпIыл Мурат ыцIэкIэ къэзэрэугъоигъэхэм къафэгушIуагъ АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат.
Джащ фэдэу Урысыем спортымкIэ иминистрэу Михаил Дегтяревым ишIуфэс гущыIэхэр Iофтхьабзэм хэлажьэхэрэм афигъэзагъ УФ-м кушъхьэфэчъэ спортымкIэ и Федерацие игенеральнэ пащэу Юрий Кучерявым.
Iоныгъом и 7-м къыщегъэжьагъэу и 20-м нэс Темыр-Кавказ федеральнэ округым хэхьэрэ шъолъыри 5-мэ ар ащыкIощт, Мыекъуапэ щырагъэжьэнышъ, Чэчэн Республикэм щаухыщт.
Урысыемрэ Беларусьрэ яспортсмен анахь лъэшхэр ары ащ хэлэжьэщтхэр. Iоныгъом и 7-м сыхьатыр 11-м Урысыем ичемпионат Мыекъуапэ щырагъэжьэщт. Апэрэ мафэм километри 128,3-рэ зэпачынышъ, спортсменхэр псэупIэу Казенно-Кужорскэм нэсыщтых. Кушъхьэфачъэхэм атесхэу спортсменхэр къызэпачъэхэзэ, километрэ 1509-рэ хъурэ гъогууанэр зэпачыщт.
Шъугу къэтэгъэкIыжьы, мыщ фэдэ зэнэкъокъухэр 1993-рэ илъэсым къыщегъэжьагъэу рагъэкIокIых. Адыгэ Республикэр зызэхащагъэр илъэс зыщыхъурэм ехъулIэу, 1993-рэ илъэсым, Адыгеим и Президентэу Джарымэ Аслъан кIэщакIо зэрэфэхъугъэм тетэу кушъхьэфэчъэ спортымкIэ зэнэкъокъоу «Темыр Кавказым ис лъэпкъхэм язэкъошныгъ» зыфиIорэр апэрэу Мыекъуапэ щыкIуагъ. 1994-рэ илъэсым къыщегъэжьагъэу кушъхьэфэчъэ спортымкIэ Урысые чемпионатым къыхиубытэу ар зэхащэ.