Апэрэ дунэе заом илъэ­хъан Адыгеим икъушъхьэчIэсхэмрэ Пшызэ ­шъолъыр икъэзэкъхэмрэ дзэкIолI зэкъошныгъэ зэрэзэдыряIагъэм фэгъэ­хьыгъэ шIэжь Мафэм къыхиубытэу мэфэкI концертэу зыгъэпсэфыпIэ къэлэ паркым къыщатыгъэр Iофтхьабзэмэ якIэухэу хъугъэ.
Iэнэ хъураем хэлэжьа­гъэхэр, къэлэдэсхэр, хьа­кIэхэр ащ къекIолIагъэх.

ЛIымыщэкъо Рэмэзан ишIу­фэс псалъэкIэ пстэуми за­къы­фигъэзагъ:
— Апэрэ дунэе заор къызе­жьэм, Темыр Кавказым ис адрэ лъэпкъхэм афэдэу Адыгеим икъушъхьэчIэсхэри Пшызэ шъо­лъыр икъэзэкъхэм IэпыIэгъу афэ­хъугъагъэх. 2014-рэ илъэсым тиреспубликэ щаштэгъэ законым тетэу Адыгеим ишыудзэрэ Пшызэ шъолъыр икъэзэкъхэмрэ ядзэ­кIолI зэкъошныгъэ ишIэжь Мафэ хагъэунэфыкIы хъугъэ. Мы мафэр непэ япшIэнэрэу хэтэгъэунэфыкIы. Адыгэ къушъхьэчIэсхэмрэ къэзэкъхэмрэ язы­кIыныгъэ осэшхо зиIэ шIуа­гъэу щыт. Кавказым ис лъэпкъ­хэр къызэтенэжьынхэмкIэ, те­кIоныгъэ къыдахынымкIэ а зэ­къошныгъэр ары сыдигъуи зишIуагъэ къакIощтыгъэр. Непи, хэгъэгур чIыпIэ къин зыщит лъэхъанми, хэушъхьафыкIыгъэ дзэ операциер зыщыкIорэ чIыпIэхэм къушъхьэчIэсхэми къэзэкъхэми я Хэгъэгу ифедэхэр къащаухъумэх, — къыIуагъ ЛIымыщэкъо Рэмэзан.

Атаманэу Сергей Захаровым Iофтхьабзэм къыщыхигъэщыгъ илъэси 110-кIэ узэкIэIэбэжьмэ, Кавказ шыудзэу зэхащэгъагъэм хэтхэу къушъхьэчIэсхэри къэзэкъхэри псэемыблэжьэу пыим зэрезэуагъэхэр.
— Сэ шъунаIэ зытешъоз­гъадзэмэ сшIоигъор лъэхъэнэ зэфэшъхьафхэм къушъхьэчIэс­хэмрэ къэзэкъхэмрэ зэгъусэхэу зэрэзэдэзэуагъэхэр, Кавказым ис лъэпкъхэр зэкъотхэу пыим зэрэпэуцужьыщтыгъэхэр ары. Я ХIХ-рэ, я ХХ-рэ лIэшIэгъухэми, нэмыкI лъэхъанхэми тхьамыкIагъо къазыфыкъокIыкIэ Урысыем ис лъэпкъхэр зэрэзэкъоуцощтыгъэхэр мы мафэм тиныбжьыкIэхэм агу къызэригъэкIыжьыщтым сицыхьэ телъ. Непи пытэу ахэр зэкъотых. Урысыем щыпсэурэ лъэпкъ зэфэшъхьафхэм азыфагу тапэ­кIи зыкIыныгъэ пытэ илъыщт», — къыIуагъ Сергей Заха­ровым.
Нэужым творческэ купхэмрэ Мыекъуапэ иартистхэмрэ хьа­кIэхэм концерт къафатыгъ. Адыгэ къашъомкIэ ансамблэу «Мыекъуапэ инэфылъэхэр» зы­фиIорэм, ансамблэу «Казачата», «Ошъадэм» иартисткэу Хъурэнэ Азэ, ансамблэу «Ащэмэзым» икъэгъэлъэгъонхэм Iофтхьабзэр къагъэдэхагъ.
Александра Балабась.
Сурэтхэр авторым иех.