УФ-м и Президентэу Владимир Путиныр хэбзэIахьхэмкIэ политикэм илъэныкъо шъхьаIэхэм афэгъэхьыгъэ хэбзэгъэуцугъэм кIэтхагъ.

Сабый зэрыс унагъохэр, биз­несыр, нэмыкIхэр ащ къыхеубытэх. ГущыIэм пае, къэралы-
гъо ыкIи муниципальнэ орга­низациехэм медицинэ IэпыIэгъу псынкIэм иавтомашинэ бэджэндэу заштэкIэ, шIушIэ Iэ­пыIэгъум пылъ фондхэм кIэлэцIыкIухэр зыщырагъаджэхэрэ учреждениехэм мылъку горэкIэ задеIэхэкIэ хэбзэIахь амытынэу ащ къыдыхэлъытагъ.
Джащ фэдэу КъокIыпIэ Чы­жьэм, Къырым ыкIи Севастополь яаэропортхэм къарыбыбыкIыхэрэм НДС зэрамытырэр 2028-рэ илъэсым ищылэ мазэм и 1-м нэс лъыгъэкIотэгъэнэу законым къыщеIо.
ХэбзэIахьхэм ятын нахь къы­зэрыкIо къэзышIырэ системэу страхованиемкIэ взносхэмрэ отчетхэмрэ къыздэмылъыта­гъэхэр (автоупращенка) зыгъэфедэрэ унэе предпринимательхэмрэ компаниехэмрэ лIыкIохэр агъэфедэзэ Iоф ашIэн алъэ­кIы­нэу хэбзэгъэуцугъэм фитыныгъэ къаритыгъ. ГущыIэм пае, «маркетплейс» зыфаIорэ интернет щапIэхэм япродукцие е ятовар ащыIуагъэкIын алъэкIыщт.
Джы сабыибэ зиIэ унагъохэм афэгъэхьыгъэ къэбарыр хэбзэ­IахьхэмкIэ Федеральнэ къулыкъум фэкIощт. Ащ ишIуагъэкIэ унагъохэм мылъкум пае хэбзэ­IахьхэмкIэ фэгъэкIотэнэу яIэхэр агъэфедэнхэу лъэIу тхылъ атыжьын ищыкIэгъэщтэп.
Физическэ лицэхэм мылъкум пае атырэ хэбзэIахьхэм якIэлъытыкIыжьынкIи шапхъэхэм зэхъокIыныгъэхэр афэхъугъэх. Транспортым, чIыгум, нэмыкI мылъкум апае хэбзэIахьхэр мыщ къыхеубытэх. 2025-рэ илъэсэу къакIорэм щыублагъэу ащ фэдэ кIэлъытыкIыжьын зищыкIагъэхэм лъэIу тхылъэу атыщтыр зы шъуашэм итэу гъэпсыгъэщт. Ар «унэе каби­нетыр», МФЦ-р е хэбзэIахь­хэмкIэ Федеральнэ къулыкъум иинтернет нэкIубгъо къызфа­гъэфедэзэ атын алъэкIыщт.