Адыгеим и Къэралыгъо филармоние и Нысхъэпэ театрэу «Дышъэ къошын» зыфиIорэм иIофшIэгъу лъэхъаныкIэ къызэIуехы. Теат­ра­лизованнэ къэгъэлъэгъоныкIэу «Сыбзэ — ситам» зыфиIорэр Iоны­гъом и 22-м кIэлэцIыкIухэм шIухьафтын шъыпкъэ афэхъущт.

Нысхъэпэ театрэм уахътэм зыдыригъаштэзэ, шапхъэхэмрэ амалхэмрэ ыгъэфедэзэ лъэбэ­къукIэхэр ешIых. «Сыбзэ — си­там» зыфиIорэ къэгъэлъэгъоныкIэм нысхъапэхэр адыга­бзэкIэ къыщэгущыIэх. Нысхъапэу «Къух» адыгэ орэдыжъэу шъошакIэм илъым дежъыу. Къе­кIолIэгъэ сабыйхэм орэдэу «Синан» къызэдаIощт. ГъэшIэгъон дэдэр псэушъхьэ Iэли, нысхъэпэ цIыкIуи адыгабзэкIэ къызэрэгущыIэхэрэр ары.
— «Сыбзэ — ситам» зыфиIорэ къэгъэлъэгъоным сценэм тет артистхэмрэ кIэлэцIыкIоу еплъыхэрэмрэ зэрепхых, нахь зэпэблагъэ ешIых, яшIэныгъэхэм ахегъахъо, лъэпкъым игу­шъхьэ­лэжьыгъэ бай анаIэ нахь тырарегъадзэ, ныдэлъфыбзэм иIэшIугъэ алъегъэIэсы. Анахьэу хэзгъэунэфыкIы сшIоигъор пшы­сэм еплъынэу къэкIощт кIэлэцIыкIухэр къэгъэлъэгъоным зэ­рэхэлэжьэщтхэр ары. Еплъы­хэрэр ары герой шъхьаIэхэр. Ахэм тадэджэгузэ, адыгабзэкIэ къэдгъэгущыIэщтых, пшысэм хэтщэщтых, — еIо Нысхъэпэ театрэм ипащэу Джолэ Ла­рисэ.
Нысхъэпэ театрэм ихудожественнэ пащэу, АР-м инароднэ артистэу Сихъу Станислав къы­зэриIуагъэмкIэ, кIэлэцIыкIухэм апае зэхащэрэ къэгъэлъэгъонхэу адыгабзэкIэ къиIотыкIыгъэ­хэр нахьыбэ шIыгъэным «Дышъэ къошыныр» пылъыщт, тапэкIэ проектыкIэхэр зэхищэщтых.
— Нысхъэпэ театрэу «Дышъэ къошын» зыфиIорэм икъэгъэ­лъэгъоныкIэу М. Лермонтовым ироманэу «Герой нашего времени» зыфиIорэм къыхэхыгъэ пычыгъоу «Бэла» чъэпыогъум и 8-м щыIэщт. Урысые поли­тическэ партиеу «Единэ Россиер» кIэщакIо зыфэхъугъэ федеральнэ проектэу «Культура малой Родины» зыфиIорэм къыдыхэлъытэгъэ лъэныкъоу «Театрэхэр — кIэлэцIыкIухэм апай» зыцIэм епхыгъэу мыр агъэуцу, — къыIуагъ Джолэ Ларисэ.
Мыщ фэгъэзагъэр режиссерэу Нэгъой Зуриет ары. КIэ­лэ­цIыкIухэм ныбджэгъуныгъэу зэдашIыгъэр агъэпытэзэ ямурадхэм афэкIох, пэрыохъухэр къызэранэкIых.
— Гукъау нахь мышIэми тисабыйхэм адыгабзэр икъоу ашIэрэп. Арышъ, мыщ фэдэ шIыкIэкIэ ныдэлъфыбзэм изэгъэшIэн къыфэтщэнхэр зы хэ­кIыпIэу тэлъытэ. КIэлэцIыкIу те­атрэм иактерхэр джэгуным лъэшэу фэlазэх. Культурэ ин зэрахэлъыр къахэщэу артистхэм сценэм зыкъыщагъэлъагъо, спектаклым еплъынэу къэкIуагъэхэм алъэIэсых. Къэгъэлъэгъоныр цIыфхэм агу рихьынэу тыщэгугъы, — еIо Нэгъой ­Зурет.
Лъэпшъыкъо Фатим.