Ессентуки щызэрэугъоигъэх
Теннис цIыкIумкIэ зэнэкъокъоу «Шаг в будущее — СКФО» зыфиIорэм Адыгэ Республикэм илIыкIохэр хэлажьэх.
Мыщ зыщызыушэтырэ Темыр-Кавказ федеральнэ шъолъырым щыпсэурэ пшъашъэхэр ыкIи кIалэхэр къалэу Ессентуки щызэрэугъоигъэх. Ахэм аныбжь илъэс 16-м шIокIырэп. Зэнэкъокъум кIэщакIо фэхъугъ Свердловскэ хэкум ит къалэу Верхняя Пышма теннис цIыкIумкIэ иклубэу «УГМК» зыфиIорэр.
Iофтхьабзэм хэлажьэх Къэбэртэе-Бэлъкъарым, Темыр Осетием — Аланием, Дагъыстан, Краснодар ыкIи Ставропольскэ крайхэм яспортсменхэр. Командэ пэпчъ пшъэшъиплIырэ кIэлиплIырэ хэт.
БлэкIыгъэ турнирым текIоныгъэр къыщыдэзыхыгъэр Ставропольскэ краир ары, мыщ ипшъашъэхэр ыкIи икIалэхэр зэкIэми анахь лъэшыгъэх. Адыгеим илIыкIохэм ятфэнэрэ чIыпIэр къахьыгъагъ.
Команднэ ыкIи унэе зэнэкъокъухэм ахэлэжьэщт тиспортсменхэм якъэгъэлъэгъонхэр нахьышIу ашIынхэм фэхьазырых, ахэм гъэхъэгъэшIухэр ашIынхэу афэтэIо.
