Къуаджэу Улапэ икомандэу футболымкIэ Урысые зэнэкъокъум хэлэжьагъэм яхэнэрэ чIыпIэр къыди­хыгъ нахь мышIэми, ешIэкIэ дахэ къыгъэлъэ­гъуагъ, чылэм, районым ыкIи рес­публикэм ацIэ дахэкIэ раригъэIуагъ.

КIэлэцIыкIу турнирэу «Шъо Iэгуау» зыфиIорэм ифинал едзыгъо къалэу Ессентуки щыкIуагъ. Ащ 2013 – 2014-рэ илъэсхэм къэхъугъэ кIалэхэр хэлэжьагъэх, зэкIэмкIи командэ 16-мэ яухьазырыныгъэ къагъэлъэгъуагъ. Красногвардейскэ районым икомандэ яхэнэрэ чIыпIэр къыфа­гъэшъошагъ. Ащ ыпэ ишъыгъэх Псков, Ялтэ, Чебоксары, къэлэ гъэпсыкIэ зиIэ псэупIэу Смышляевки (Самарскэ хэку) ыкIи Липецкэ къэзыгъэлъэгъуагъэхэр.

ТикIалэхэм Улапэ къызагъэзэжьым, къоджэдэсхэр дахэу апэгъокIыгъэх, адыгэ джэгу афызэхащагъ. Мы мафэр шIукIэ ахэм агу къинэжьыщт.