АР-м иконцертнэ зэхахьэ и Къэралыгъо симфоническэ оркестрэ я 32-рэ лъэхъаныр къызэIуихыщт. Iоф­тхьабзэр Iоныгъом и 6-м Адыгеим ифилармоние щыкIощт.

Мыщ фэгъэхьыгъэу Адыгэ Респуб­ликэм исимфоническэ оркестрэ ихудожественнэ пащэу ыкIи идирижер шъхьа­Iэу СтIашъу Къэплъан гущыIэгъу тыфэ­хъугъ.
— ЛъэхъаныкIэр гъэшIэгъоныщт. Сим­фоническэ оркестрэм солистэу Максим Тимофеевыр игъусэу концерт зэхэт­щэщт. ЕдэIухэрэм мэкъамэм ыкIуачIэ зыхашIэн амал яIэщт. Ащ нэмыкIэу программэм къыдыхэлъытагъэх Урысыем инароднэ артистэу, орэдыIо-къэшъокIо ансамблэу «Ислъамыем» ихудожественнэ пащэу Нэхэе Аслъан мэфэкI увер­тюрэу ытхыгъэр, Дмитрий Шостаковичым иапэрэ симфоние, С. Рахманиновым имэкъамэхэр концертым щыIущтых.
Симфоническэ оркестрэм Iоф зи­шIэрэм щыублагъэу мэкъэмэ шъэ пчъа­гъэ къыригъэIуагъ. Къэгъэлъэгъон пэпчъ зы кIэ горэм цIыфхэр нэIуасэ фешIы.
— Iоныгъо мазэм «Саусырыкъо» зыфиIорэ пшысэр къэдгъэлъэгъощт, оркестрэм мэкъамэхэр къыригъэIощт. Пшысэм хэт усэмэ адыгабзэкIэ къя­джэщт «Ислъамыем» иорэдыIоу ХъокIо Сусанэ. А. Нэхаим ипроизведениехэр лъэпкъ фольклорым, щыIэныгъэм къахэхыгъэх. Орэдышъом лъапсэу фишIырэм зырегъэ­ушъомбгъу, псэ къыпегъакIэ, тамэу ритыгъэр зэкIещы. Имузыкэ лъэпкъ гупшысэм къыпкъырэкIы. Джащ фэдэу композитор цIэрыIоу Михаил Глинки къызыхъугъэр илъэси 100 зэрэхъурэм фэгъэхьыгъэ къэгъэлъэгъон редгъэкIо­кIыщт. Академическэ мэкъамэм фэгъэ­хьыгъэ шъолъыр ыкIи дунэе фестивальхэр зэхэтщэщтых. Ащ пшъэрылъэу иIэр лъэпкъ искусствэр къызэтегъэнэгъэныр, тапэкIэ хэхъоныгъэ егъэшIыгъэныр, цIыфхэр академическэ искусствэм фэщэгъэнхэр, зэлъашIэгъэ композиторхэм адакIоу музыкант ныбжьыкIэхэми нэIуа­сэ афэшIыгъэнхэр ары, — къыIуагъ СтIашъу Къэплъан.
Iофтхьабзэу Мыекъуапэ щыкIощтыр лектор-музыковедэу Хьакъуй Заремэ зэрищэщт.
Филармониер щыIэныгъэм ихъугъэ- шIагъэхэм ягупчэ итэу цIыфхэр зэфещэх. Музыкантхэм къагъэхьазырыгъэ къэгъэ­лъэгъоным искусствэр зышIогъэшIэгъон­хэм гухахъо хагъуатэу еплъынхэу къырагъэблагъэх.
Лъэпшъыкъо Фатим.
Сурэтыр: СтIашъу Къэплъан.