Гупчэр цIыф кIуапIэ хъунэу
Адыгеим и ЛIышъхьэу КъумпIыл Мурат Тэхъутэмыкъое районымкIэ къуаджэу Нэтыхъуае зэкIом, лъэпкъ творчествэм и Гупчэ ишIын зынэсыгъэм зыщигъэгъозагъ.
Шъугу къэтэгъэкIыжьы Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым пшъэрылъ зэрафишIыгъэм тетэу псэуалъэм игъэпсын зэрэкIорэр. Мы илъэсым имэкъуогъу мазэ къуаджэу Нэтыхъуае культурэм и Унэу дэтым ипащэу Бек Зуриет лъэпкъ творчествэм и Гупчэ якъуаджэ щыгъэпсыгъэным иIофыгъокIэ Полномочнэ лIыкIом зыфигъэзагъ. Къуаджэм нэбгырэ 350-рэ щэпсэу, культурэм и Унэу 1959-рэ илъэсым ащ щагъэпсыгъэр зэхэоным иIоф зэрэнэсыгъэм къыхэкIэу кружокхэм яIофшIэни, творческэ купхэм ярепетициехэри ублэпIэ еджапIэм щызэхащэщтыгъэх.
Адыгеим и ЛIышъхьэ пшъэрылъ афишIыгъ лъэпкъ творчествэмкIэ ГупчакIэу агъэпсыщтым ипроект изэхэгъэуцон пае сомэ миллион 88-рэ республикэ бюджетым къыхагъэкIынэу. Квадрат метрэ 668-рэ зэлъызыубытыщт Гупчэм нэбгыри 150-мэ ателъытэгъэ концерт зал, къэшъуапIэ, бэнапIэ, зыгъэпсэфыпIэ хэтыщтых. Мы илъэсым итыгъэгъэзэ мазэ псэуалъэм ишIын аухынэу рахъухьэ.
Непэрэ мафэм ехъулIэу унэм ыпкъ агъэуцугъах, унэ кIоцI ыкIи унэ кIыб IофшIэнхэм ауж итых, инфраструктурэр зэтырагъэпсыхьэ. Республикэм ипащэ псэолъэшIыпIэр къызэпиплъыхьагъ, псэолъэшIынымкIэ пIалъэхэр амыукъонхэмкIэ, чIыпIэм изэтегъэпсыхьанкIэ, Гупчэм ишIын зэраухырэм лъыпытэу ищыкIэгъэ оборудованиер чIэгъэуцогъэнымкIэ пшъэрылъ заулэ афишIыгъ.
«Къоджэ цIыкIухэм адэсхэр анахьэу зыщызэIукIэхэрэр, зызыщагъэпсэфырэр культурэм иунэхэмрэ лъэпкъ творчествэм игупчэхэмрэ ары. Нахьыжъхэри, нахьыкIэхэри мыщ фэдэ чIыпIэхэм ащызэIукIэнхэ, опытэу яIэмкIэ щызэхъожьынхэ, творчествэм щыпылъынхэ, культурэмкIэ, шэн-хабзэхэмкIэ нахьыжъхэм шIэныгъэу яIэр нахьыкIэхэм щалъагъэIэсын алъэкIыщт. Пшъэрылъэу тиIэр цIыфхэр Гупчэм щыгупсэфынхэмкIэ, яунэ ис фэдэу ахэм къащыхъунымкIэ, кружок зэфэшъхьафхэм чанэу ахэлэжьэнхэмкIэ, творческэ купхэм якъэгъэлъэгъонхэм ягуапэу яплъынхэмкIэ, Мыекъуапэ дэс артистхэри мыщ къэкIонхэмкIэ ищыкIэгъэ амалхэр зетхьанхэр ары. КъоджэдэсхэмкIэ ащ мэхьанэшхо иI, ахэр зэрэдгъэгугъагъэхэр дгъэцэкIэжьын фае», — къыIуагъ КъумпIыл Мурат.
АР-м и ЛIышъхьэ ипресс-къулыкъу къытыгъэ
къэбархэмкIэ ЛIышэ Саныет.