ГандболымкIэ Урысыем ичемпионат и Супер­лигэ хэт «АГУ-Адыифым» илъэсыкIэ лъэхъаным къыдыхэлъытэгъэ апэрэ ешIэгъур Мыекъуапэ щыриIэщт.

Iоныгъом и 6-м республикэм икъэлэ шъхьаIэ ихьакIэщт Новороссийскэ икомандэу «Черноморочкэр».
Мы командэхэр зэкIэмкIи гъо­гогъуитIо зэIукIагъэх, мыр ящэ­нэрэщт. «Черноморочкэм» те­кIоныгъитIу къыдихыгъ. Ново­российскэ илIыкIохэр мы илъэсым апэрэ чIыпIэм фэбэнэнхэу загъэ­хьазыры. Мы мафэхэм Москва щыкIогъэ зэнэкъокъум хэлэжьагъэх «ЦСКА», «Звезда», «Кубань», «Динамо-Синара» зыфи­Iохэрэр. Ахэм зэкIэм апэ ­ишъыгъ «Черноморочкэр». Мы командэм щешIэх «АГУ-Адыифым» хэты­гъэхэ Дарья Вигуржинскаяр (Богдановар), Анна Красновар, Елена Стрельцовар, ганд­болымкIэ Мыекъопэ еджапIэм щагъэсэгъэ Дарина Ни­кулинар.
Адыгеим икомандэ щешIэнхэу къагъэзэжьыгъ спортымкIэ мас­терхэу Дарья Гильфановамрэ Алина Казанджянрэ. Шъобж къыз­тыращагъэм ыуж зэтеуцожьыгъ ыкIи ешIапIэм къихьаным фэхьазыр Къэбжь Заремэ. Джащ фэдэу «АГУ-Адыифым» къыхэхьагъэх София Гогия («Уфа-Алиса»), Алина Тишинар («Ставрополье»), Ксения Пономаревар («Астраханочкэр»), Елизавета Суздальцевар («Черноморочкэр»). Командэм хэкIыжьыгъэх Валентина Томилинар, Екатерина Терлецкаяр ыкIи Дарья Миловар. Командэм икапитаныщт Кобл Зуретэ, тренер шъхьаIэр — Наталья Де­репаско.
«АГУ-Адыифымрэ» «Черноморочкэмрэ» яешIэгъу Iоныгъом и 6-м Адыгэ къэралыгъо университетым иордэунэу Кобл Якъубэ ыцIэ зыхьырэм щыкIощт. Ар пчыхьэм сыхьатыр 6-м рагъэ­жьэщт, учIэхьаным пае ыпкIэ лъыптын ищыкIагъэп.