СурэтышIхэм ямэфэкI къэгъэлъэгъон
АР-м исурэтышIхэм я Союз зызэхащагъэр илъэс 45-рэ зэрэхъугъэм фэгъэхьыгъэ Iофтхьабзэ Сурэт къэгъэлъэгъуапIэм тыгъуасэ щыкIуагъ.
1979-рэ илъэсым Союзыр агъэпсыгъ, ащ сурэтышI нэбгырэ 54-рэ хэхьэ. Жанрэ зэфэшъхьафхэм арылъ IофшIэгъи 100-м ехъу мэфэкI къэгъэлъэгъоным хагъэлажьэ. Iоныгъом и 15-м нэс ар кIощт. Ахэм ахэтых Урысыем, Адыгеим янароднэ сурэтышIхэм, культурэм изаслуженнэ IофышIэхэм ясурэтшIыгъэхэр, Сурэт къэгъэлъэгъуапIэм ифонд къыхэхыгъэхэри, унэе коллекциехэм ащыщхэри.
Адыгеим и Сурэт къэгъэлъэгъуапIэ непэ пшъэрылъышхо зэшIуехы, бэ Iофтхьабзэу щырекIокIырэр, культурэм епхыгъэ хъугъэ-шIэгъэ гъэшIэгъонхэр щызэхащэх. Непэрэ зэхахьэм, пстэуми афэмыдэу, республикэм исурэтышIхэмкIэ мэхьанэшхо иI — лIэшIэгъуныкъом ашIыгъэ IэшIагъэхэм уасэ къафашIы.
Iофтхьабзэр къызэIуихыгъ АР-м культурэмкIэ иминистрэу Аулъэ Юрэ.
— Адыгэ Республикэм и ЛIышъхьэу КъумпIыл Мурат ыцIэкIэ сурэтышIхэм я Союз имэфэкIкIэ сышъуфэгушIо. Культурэм хэхъоныгъэ ышlыныр къэралыгъом ипшъэрылъ шъхьаIэхэм ащыщ. А мэхьанэшхо зиIэ IофшIэным сурэтышIхэм яIахьышIу хэлъ. МэфэкIым ипэгъокIэу къэгъэлъэгъонэу агъэхьазырыгъэр ащ ишыхьат, — къыIуагъ Аулъэ Юрэ.
АР-м культурэмкIэ и Министерствэ ищытхъу тхылъхэр зыфагъэшъошагъэхэм ыкIи Союзым хэхьэгъакIэхэм ар къэзыушыхьатырэ билетхэр зэхахьэм щаритыжьыгъ Министерствэм иотдел ипащэу Шэуджэн Бэлэ.
Урысыем исурэтышIхэм я Союз итхьаматэу Ковальчук Андрей ыцIэкIэ къэзэрэугъоигъэхэм шIуфэс къарихыгъ. Краснодар краимкIэ Союзым икъутамэ ипащэу Алексей Буртасенкэм ыкIи Союзым ыцIэкIэ дипломхэр аритыжьыгъ. Джащ фэдэу дышъэ медалэу «Гушъхьэлэжьыгъ. Шэн-хабзэхэр. IэпэIэсэныгъ» зыфиIоу АР-м исурэтышIхэм я Союз итхьаматэу Елена Абакумовам къыфагъэшъошагъэри ритыжьыгъ.
Е. Абакумовар исэнэхьатэгъухэм къафэгушIуагъ, Адыгеим ихудожественнэ искусствэ хэхъоныгъэшхохэр зэришIыгъэр хигъэунэфыкIыгъ.
СурэтышIхэм ямэфэкIкIэ гущыIэ фабэхэр къариIуагъ КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэ ипащэу ШъэуапцIэкъо Аминэт ыкIи музеим ыцIэкIэ рэзэныгъэ тхылъхэр сурэтышIхэм афигъэшъошагъ.
IэпэIасэхэм яIэшIагъэхэм гупшысакIэр, шэн-хабзэхэр апхырыщыгъэх. Лъэпкъым итхыдэ дахэу къэбгъэлъэгъон фаеу зыхъурэм, искусствэр, ащ изы Iахьэу сурэтшIыныр, шIыкIэ-амалышIоу щыт. Сурэтым ижабзэкIэ къэгъэлъэгъогъэ тхыдэр лIэшIэгъухэм къахэнэщт.
Лъэпшъыкъо Фатим.
Сурэтхэр: Iэшъынэ Аслъан.