АР-м иминистрэхэм я Кабинет зэхэсыгъоу гъэсэныгъэ языгъэгъотырэ организациехэр илъэсыкIэ еджэгъум зэрэфэхьазырхэмкIэ къэбарэу Адыгеим гъэсэныгъэмрэ шIэныгъэмрэкIэ и Министерствэ къытыгъэм щедэIугъэх.

АР-м гъэсэныгъэмрэ шIэныгъэмрэкIэ иминистрэу Евгений Лебедевым зэхэсыгъом къызэрэщиIуагъэмкIэ, республикэм гурыт еджэпIи 139-рэ, кIэлэцIыкIу Iыгъы­пIи 133-рэ, сэнэхьат гъэсэныгъэ языгъэгъотырэ къэралыгъо учреждении 5, гъэсэныгъэ тедзэ языгъэгъотырэ организацие 19 ит.
Iоныгъом и 1-м ехъулIэу псэупIэхэу Яблоновскэмрэ АдыгеякIэмрэ нэбгырэ 1100-рэ зырызмэ ателъытэгъэ еджэпIитIу къащызэIуахыгъ. Джыдэдэм еджэпIищмэ ягъэпсын ыуж итых.
2022-рэ илъэсым еджэпIи 8, 2023-м – 7, 2024-м – 5 агъэцэкIэжьыгъ. 2025-рэ илъэсым еджэпIи 7-мэ гъэцэкIэжьын IофшIэнхэр арашIылIэнэу щыт. ЕджэпIэ 50-мэ, кIэлэцIыкIу IыгъыпIэ 29-мэ ягъэцэкIэжьын пае УФ-м просвещениемкIэ и Министерствэ ялъэIу тхылъхэр рахьылIагъэх. Мыгъэ спортзали 3-мэ ягъэцэкIэжьын аухыщт, спорт джэгупIитIу къызэIуахыщт, гъэсэныгъэ языгъэгъотырэ организации 5-мэ яспорт клубхэм ящыкIэгъэ оборудованиер аIэкIагъэхьащт. Илъэси 10-м къыкIоцI республикэм ит еджапIэхэм яспортзал 94-мэ гъэцэкIэжьын IофшIэнхэр арашIылIагъэх.
2016-рэ илъэсым къыщегъэжьагъэу 2023-рэ илъэсым нэс еджапIэхэм автобуси 110-рэ къазэраратыгъэр, джыри автобус 11 къафыхагъэкIынэу зэрэщытыр зэхэсыгъом къыщаIуагъ. ЕджапIэхэм ятхылъеджапIэхэм зэреджэхэрэ тхылъ мини 123-м ехъу къафащэфыгъ. Республикэм иеджапIэхэм яапэрэ классхэм арыхьагъэхэм Адыгеим и ЛIышъхьэ ыцIэкIэ канцеляр пкъыгъохэр зыдэлъ Iалъмэкъ миних аратыгъ. Ащ фэдэ Iалъмэкъ 700 Херсон хэкумкIэ Геническэ районми рагъэщагъ.
«Точка роста» зыфиIорэ гупчэ 89-мэ джыри 13 къахэхъощт. Гурыт еджапIэу N 3-м чъэпыогъум кванториум къыщызэIуахыщт.
АР-м иминистрэхэм я Кабинет и Тхьаматэ зэхэсыгъом хэлажьэхэрэм анахьэу анаIэ зытыраригъэдза­гъэр Адыгеим и ЛIышъхьэ гъунэ зылъифырэ Iофыгъо­хэр ары. Ахэм ахэхьэх гурыт еджапIэхэм ачIэсхэм шхыныгъо стырхэр аIэкIэгъэхьэгъэнхэм, кIэлэеджа­кIохэр еджапIэхэм ящэлIэгъэнхэм, гъэсэныгъэ языгъэгъотырэ учреждениехэр икъоу ухъумэгъэнхэм, еджапIэхэм яфэныкъоныгъэхэм апае ны-тыхэм ыпкIэ аIамыхыным япхыгъэ Iофыгъохэр.