АР-м иминистрэхэм я Кабинет изэхэсыгъо зыщытегущыIэгъэ Iофыгъохэм ащыщ унэ-коммунальнэ комплексым ипсэуалъэхэр бжыхьэ-кIымэфэ лъэхъаным зэрэфэхьазырхэр.

АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэу Валерий Картамышевым зэхэсыгъом къызэрэщиIуагъэмкIэ, джыдэдэм котельнэ 258-р, фэбэпIэ сеть километрэ 288-р, газрыкIопIэ километрэ мини 5-м ехъур, псыIыгъыпIэ 276-р, псырыкIопIэ, канализационнэ трубэ километрэ мини 2,7-м ехъур, фэтэрыбэу зэхэт унэ 1958-р гъэфэбэгъу уахътэм фагъэхьазырых.
Бжыхьэ-кIымэфэ лъэхъаным зэрэфэхьазырхэмкIэ муниципалитет пстэуми паспортхэр къазэраратыгъэхэр зэхэсыгъом щыхагъэунэфыкIыгъ. Фабэр къаIэкIэзыгъэ­хьэрэ организациехэм яIофшIэн зэрэзэхащэрэм Рос­тех­надзорым гъунэ лъефы. Хэукъоныгъэу ащ къыхигъэ­щыхэрэр чъэпыогъум и 1-м нэс дагъэзыжьынхэ фае.
Адыгеим иминистрэхэм я Кабинет и Тхьаматэу КIэрэщэ Анзаур муниципалитетхэм япащэхэм къя­джагъ унэ-коммунальнэ хъызмэтым ипсэуалъэхэр джырэ шапхъэхэм адиштэу игъом зэтырагъэпсыхьажьынхэу.

«ГъэрекIо бжыхьэ-кIымэфэ лъэхъаным зыфэгъэхьазырыгъэнымкIэ щыкIагъэу щыIагъэхэр къыдалъытэзэ, муниципальнэ образованиехэм япащэхэм мы лъэныкъомкIэ IофшIэныр агъэлъэшын фае. ПсэупIэ-коммунальнэ комплексым иIофшIэнкIэ цIыфхэм тхьаусыхэ тхылъэу къаIэкIагъахьэхэрэм псынкIэу ахэплъэнхэ фае», — къыIуагъ КIэрэщэ Анзаур.
Ростехнадзорым и Темыр-Кавказ гъэIорышIапIэ ипащэ игуадзэу Виктор Коноваленкэр фабэр къаIэкIэзыгъэхьэрэ организациехэм яIофхэм язытет къытегущыIагъ. Муниципалитетхэм яадминистрациехэм япащэхэм мы лъэныкъомкIэ Iофэу ашIэрэр къаIотагъ.
КIэрэщэ Анзаур зэхэсыгъом хэлажьэхэрэм анаIэ тыраригъэдзагъ Ростехнадзорым къыхигъэщырэ хэукъо­ныгъэхэр игъом дэгъэзыжьыгъэнхэм мэхьанэшхо зэриIэм. Социальнэ лъэныкъом епхыгъэ псэуалъэхэм нахь лъэшэу анаIэ атырагъэтын фаеу ащ ылъытагъ.