АР-м иминистрэхэм я Кабинет изэхэсыгъо хэбзэ къулыкъухэм, чIыпIэ зыгъэIорышIэжьынымкIэ къулыкъухэм, организациехэм цифрэ амалхэр къызэрэзфагъэфедэхэрэм епхыгъэ Iофыгъохэми щатегущыIагъэх.

АР-м иминистрэхэм я Кабинет и Тхьаматэ игуа­дзэу, АР-м цифрэ, информационнэ, телекоммуникационнэ технологиехэмкIэ иминистрэу Шыу Заурбэч цифровизациер зэрэкIорэм къытегущыIагъ.
Ащ къызэрэхигъэщыгъэмкIэ, 2024-рэ илъэсым иятIонэрэ мэзищ IофшIэнхэр процент 75,07-м нэсэу агъэцэкIагъэх. Лъэныкъуи 9-мкIэ планым къырагъэ­хъугъ.
Анахьэу гъэхъагъэ зыщашIыгъэхэр мыщ фэдэ лъэ­ныкъохэр ары: «гъэсэныгъэм» – процент 91,83-кIэ, «къэралыгъо гъэIорышIэным» – процент 81,89-кIэ, «псауныгъэм икъэухъумэн» — процент 80,82-кIэ, «къэлэ хъызмэтым ыкIи псэолъэшIыным» — процент 71,98-кIэ.
Нахь дэеу цифрэ технологиехэр зыщагъэфедагъэр общественнэ транспортыр арэу зэрэщытыр зэхэсыгъом щыхагъэунэфыкIыгъ. АР-м иминистрэхэм я Кабинет и Тхьаматэу КIэрэщэ Анзаур пшъэрылъ афишIыгъ ахэр ыуж къызкIинэрэр зэхафынэу ыкIи ищыкIэгъэ амалхэр зэрахьанхэу.
«Лъэныкъо пэпчъ цифрэ технологиехэр зэрэщагъэфедэщтхэ шIыкIэм пэшIорыгъэшъэу дегупшысагъэх, ащкIэ шапхъэу къыхахыгъэхэм аблэкIыхэ хъу­щтэп. Непэ цифрэ технологиехэм яшIуагъэкIэ лъэныкъо зэфэшъхьафхэм яIофхэм язытет зэрагъэшIэн ыкIи псынкIэу унашъохэр аштэнхэмкIэ IэпыIэгъу афэхъун алъэкIы», — къы­Iуагъ КIэрэщэ Анзаур.
АР-м и ЛIышъхьэ ипресс-къулыкъу къытыгъэ къэбархэмкIэ ЛIышэ Саныет.