ЦIыфхэр зэкъотхэу терроризмэм зыщебэныжьы­хэрэ Мафэр тихэгъэгу тыгъуасэ щыхагъэунэфы­кIыгъ.
Илъэс 20-кIэ узэкIэIэбэжьмэ, къалэу Беслан тхьамыкIэгъошхо къыщыхъугъагъ. Террористхэм апкъ къикIыкIэ лажьэ зимыIэгъэ кIэлэцIыкIухэу, ны-тыхэу, кIэлэегъаджэхэу еджапIэм щыкIощт Iофтхьабзэм къекIолIэгъагъэхэр, хэушъхьафыкIыгъэ подразделением иIофышIэхэм ащыщхэр ащ хэкIодэгъагъэх.
А мэфэ гухэкIым зидунай зыхъожьыгъэхэри, нэмыкI террористическэ бзэджэшIагъэу Урысыем щызэрахьагъэхэм ахэкIодагъэхэри ащымыгъупшэнхэм тегъэпсыхьагъэхэу терроризмэм зэкъотхэу цIыфхэр зыщебэныжьыщтхэ Мафэр хагъэунэфыкIынэу агъэнэфэгъагъ. Тэ тыфитэп а мэфэ гухэкIхэр, террористическэ бзэджэшIагъэхэу къалэхэу Беслан, Волгодонскэ, Буйнакскэ, Москва, Санкт-Петербург, Первомайскэ, Буденновскэ, Волгоград, Каспийскэ, Владикавказ ащызэрахьагъэхэм ахэкIодэгъэ цIыфхэр тщыгъупшэнхэу.
«Мыхъун зышIэрэ пэпчъ шIокI имыIэу пщыныжь егъэхьыгъэн фаеу сэлъытэ. Террористическэ актхэм ахэкIодагъэхэм яшIэжь дгъэлъапIэзэ, терроризмэм дунаир щыухъумэгъэнымкIэ ищыкIэгъэ амалхэр зетхьанхэ фае», — ритхагъ АР-м и ЛIышъхьэу КъумпIыл Мурат ителеграм-канал.