Хэгъэгу зэошхом щыфэхыгъэ советскэ дзэкIолIым ихьадэу къагъотыжьыгъэр ичIыпIэгъухэм зыщаратыжьрэ Iофтхьабзэ Адыгеим щыкIуагъ. Ащ хэлэжьагъ АР-м и Къэралыгъо Совет – Хасэм и Тхьаматэ игуадзэу Цэй Эдуард.

Мыекъопэ районым губгъо IофшIэнхэр щызэшIуахыхэзэ Трофим Ковалевыр зыщагъэтIылъыгъагъэр къагъотыгъ. Ежь дзэкIолIым ихьадэ нэмыкIэу Iашэу ыIыгъыгъэм щыщхэмрэ медальонрэ къы­чIатIыкIыгъэх. АщкIэ дзэкIолIым ыцIэ агъэунэфыгъ. Ащ тетэу Дзэ Плъыжьым идзэкIолIэу 1942-рэ илъэсым фэхыгъэр илъэс 82-рэ зытешIэжьыгъэ ужым ичIыгужъ ащэжьынэу хъугъэ. Ар къызщы­хъугъэ Ростов хэкум имузей комплексэу «Самбекские высоты» зыфиIорэм щагъэтIылъыжьыгъ.
— ТидзэкIолIхэм ащыщыбэхэр къарыкIуагъэми яIахьыл-гупсэхэр ащымыгъуазэхэу непэ къызнэсыгъэм зыщыщ амышIэрэ къэхалъэхэм ачIэлъых. Лъы­хъокIо отрядхэм яшIуагъэкIэ Трофим Ковалевым ихьадэ игупсэхэм аратыжьынышъ, ичIыгужъ чIалъхьажьыщт. Къызщыхъугъэм щагъэтIы­лъыжьынэу ащ къылэжьыгъ. ИчIыгужъ рэхьатныгъэ щигъотыжьыщт, тэ егъашIэм ежь тыгу илъыщт ыкIи къыткIэхъухьэхэрэм ащ ыцIэ ядгъэшIэщт. Пшъэрылъэу Хэгъэгум ыпашъхьэкIэ иIагъэр ыгъэцэ­кIагъ, тэри, ТекIо­ныгъэшхор ыпэкIэ лъызы— гъэкIуатэхэрэм, типшъэрылъхэр дгъэцэкIэнхэ фае, — къы­Iуагъ Цэй Эдуард.
Iофтхьабзэм хэлэжьагъэхэм саугъэт зэхэтым къэгъагъэхэр кIэралъхьагъэх.