Къэралыгъо ыкIи муниципальнэ фэIо-фашIэхэм ягъэцэкIэн пае щэфэным (закупкэхэм) алъэныкъокIэ Iоф зышIэрэ къулыкъухэр шъыпкъагъэ зыхэмылъэу, къэрарынчъэу зекIорэ щакIохэм ащыухъумэгъэнхэм фытегъэпсыхьагъ АР-м и Къэралыгъо Совет – Хасэм федеральнэ Гупчэм фэгъэзэгъэ джэпсалъэу ыштагъэр.

— Къэралыгъо закупкэхэр зышIырэ къулыкъу зэфэшъхьафхэм мы Iофыгъор бэрэ къаIэты. Федеральнэ хэбзэгъэуцугъэу N 44-м диштэу, мы лъэныкъомкIэ зэнэкъокъухэр зызэхащэхэкIэ, щакIоу ащ къыхэлажьэхэрэм ащыщхэм товархэм ыкIи IофшIэнэу, фэIо-фашIэу агъэцэкIэщтхэм ауасэхэм япхыгъэу бгъэцэкIэн умылъэкIыщт предложениехэр къарагъэуцох. Ахэр нахьыбэрэмкIэ зэнэкъокъу­хэм ащытекIох, сыда пIомэ уасэхэр лъэшэу къырагъэIыхых. Ау мыщ дэжьым къыщыхэгъэщыгъэн фаер ащ фэдэ уасэхэмкIэ япшъэрылъхэр агъэцэкIэнхэ алъэкIынэу зэрэщымытыр ары. ЗэрэхъурэмкIэ, ар ашIэзэ къеуцох, нэужми зэзэгъыныгъэр агъэцэкIэжьырэп е дэеу агъэцакIэ, — къыщитхыгъ АР-м и Парламент и Тхьаматэу Владимир Нарожнэм иинтернет нэкIубгъохэм ащыщ.
Ащ фэдэу зипшъэрылъхэр зымыгъэцакIэрэ щакIохэм заказчикхэр ащыухъу­э­гъэнхэм фэшI УФ-м экономикэ хэхъоныгъэхэмкIэ и Министрэу Максим Решетниковым фэгъэзэгъэ джэпсалъэ Адыгеим идепутатхэм агъэхьазыри, зэда­штагъ. Уасэхэм алъэныкъокIэ шэпхъэ гъэнэфагъэу узшIокIы мыхъущтыр я 44-рэ федеральнэ хэбзэгъэуцугъэм итхэгъэным ар фэгъэхьыгъ.