ЗэрамылъэгъурэмкIэ сэкъатныгъэ зиIэхэм апае зэхащэрэ Iофтхьабзэу «Таланты рядом с нами» зыфиIорэм къыдыхэлъытагъэу, хьафизэхэм я Адыгэ республикэ хэушъхьафыкIыгъэ тхылъеджапIэ шышъхьэIум и 29-м зэIукIэгъу щыкIуагъ. «Щыщэ Сусанэ итворческэ гъогу имэкъамэхэр» зыфиIорэ пчыхьэзэхахьэр орэдыIом итворческэ гъогу илъэс 20 зэрэхъурэм фэгъэхьыгъагъ.

Сусанэ ицIыкIугъом къыщегъэжьагъэу музыкэр икIасэу щыт, фортепьянэмкIэ ыкIи орэдкъэIонымкIэ музакальнэ еджа­пIэр къыухыгъ, Пшызэ къэралыгъо университетым щеджагъ, социальнэ IофышIэ сэнэхьатыр щызэригъэгъотыгъ.
Бзылъфыгъэр мурад гъэнэфагъэхэм афэкIорэ, сэнаущыгъэ зыхэлъ цIыфэу щыт. ЩыIэныгъэм щызэрыгъозэрэ гущыIэхэр: «Згъэнэфэгъэ гухэлъ чыжьэхэм сафэбэнэщт, пытагъэ хэлъэу сафэкIощт». Непэ ар насып зиIэ бзылъфыгъ ыкIи ны, джащ фэдэу орэдыIо дэгъу хъугъэ. Ащ ымэкъэ шъабэ, иорэдкъэIуакIэ зэхэзыхырэр еумэхъы.
Жанрэ зэфэшъхьафхэм арылъ орэдхэр Щыщэ Сусанэ къеIох. Лъэпкъ нэшанэ зыхэлъ орэдхэу адыгабзэкIэ къыIохэрэм ядэIухэрэр щыIэныгъэм кIегъэгушIух. Орэдэу «Преодолей себя» зыфиIорэм хегъэгупшысыхьэх, щыIэныгъэм сыд фэдэ къиныгъо ущырихьылIагъэми, ахэр умыушхухэу зэрэзэпыпчынхэ фаер къыщыреIотыкIы.
— СищыIэныгъэ хэхъухьэгъэ едзы­гъохэм япхыгъэ орэдхэм, «Сян», «Преодолей себя», «Си­кIэлэцIыкIухэр» зыфиIохэрэм гум къикIэу екIолIакIэ ящыкIагъ. Сигупсэхэм, къыспэблагъэхэм фыщытыкIэу афысиIэр мыхэм дэгъоу къащыхэщы, — къыIуагъ Щыщэ Сусанэ.
ИлъэситIу хъугъэу Iоф зыдишIэрэ, орэдхэм ягущыIэхэр ыкIи ямэкъамэхэр фэзытхырэ Ирина Бондаревам ишIуагъэкIэ итворчествэкIэ лъэныкъо гъэнэфагъэ Сусанэ къыхихын ылъэкIыгъ. Пчыхьэзэхахьэу рекIокIыгъэм ащ ытхыгъэ орэдхэри щыIугъэх.
ЗэIукIэгъум къекIолIагъэх Сусанэ иныбджэгъухэр, Iоф дэзышIэхэрэр ыкIи исэнаущыгъэ уасэ фэзышIыхэрэр. ОрэдыIо купэу «Сувенир» зыфиIорэм Сусанэ ищыIэныгъэ щыщ IахькIэ зэпхыныгъэ дыриI. Студием ипащэу Владимр Хурс, ащ хэтхэу Шу Ольгэ, Игорь Патрий ыкIи Лариса Сердюковам шIухьафтынэу Сусанэ орэдхэр къыфаIуагъэх.
ОрэдыIо ныбжьыкIэм итворчествэ гъэхъагъэхэр щишIынхэу, насыпыр къе­бэкIэу, псауныгъэ иIэу щыIэнэу тыфэлъаIо.
Алексей Хлоповыр.
Хьафизэхэм я Урысые обществэ ичIыпIэ организациеу Мыекъуапэ дэтым итхьамат.