ХагъэунэфыкIырэ чIыпIитIу
Атлетикэ онтэгъумкIэ кIэлэеджакIохэм яя XII-рэ гъэмэфэ Спартакиадэ ифинал Краснодар краим ипсэупIэу Сукко щыкIуагъ. 2007 — 2009-рэ илъэсхэм къэхъугъэ пшъашъэхэр ыкIи кIалэхэр ащ хэлэжьагъэх.
Адыгеим ихэшыпыкIыгъэ командэ спортсмени 6 хэтыгъ: Роман Оглы, Андрей Кармановыр, Ацумыжъ Самир, Бгъошэ Асхьад, Ордэкъо Астемир ыкIи Валерия Гарькуша. ХагъэунэфыкIырэ чIыпIэхэр нэбгыритIумэ къахьыгъ. Килограмм 49-м нэс къэзыщэчыхэрэм якуп хэтыгъэ Роман Оглы тыжьын медаль къыфагъэшъошагъ. Новосибирскэ хэкум илIыкIоу Данила Решетовым текIоныгъэр къыдихыгъ. Андрей Кармановыр зы килограмм ныIэп зыщыкIагъэр хагъэунэфыкIырэ чIыпIэ къыдихынымкIэ, ар яплIэнэр. Красногвардейскэ районым щыщ Бгъошэ Асхьад джэрз медаль къыхьыгъ. Ащ килограмм 61-м нэс къэзыщэчыхэрэм якуп зыщиушэтыгъ. ЯтIонэрэ чIыпIэр Краснодар краим испортсменэу Арсений Курочкиным къыдихыгъ. Чемпион хъугъэр Чэчэн Республикэм илIыкIоу Абубакар Цакаевыр ары.