Нэбгырэ 1100-рэ зырызмэ ателъытэгъэ еджэпIитIу шIэныгъэм и Мафэ Адыгеим къыщызэIуахыгъ.

Ахэр къызыдэтэджэгъэ псэупIэхэу Яблоновскэмрэ АдыгеякIэмрэ непэ лъэ­шэу заушъомбгъу, ащыпсэухэрэм япчъа­гъэ хэпшIыкIэу хэхъо. Республикэм ихэбзэ къулыкъухэм социальнэ инфраструктурэм изегъэушъомбгъун епхыгъэ Iофыгъохэр зэрэзэшIуахыхэрэм къыкIэ­кIуа­гъэу плъытэмэ хъущт лъэпкъ проектэу «Гъэсэныгъэм» ифедеральнэ проектэу «Джырэ шапхъэхэм адиштэрэ еджапIэр» зыфиIорэм тетэу еджэпIакIэхэр къызэрэзэIуахыхэрэр.
Адыгеим и ЛIышъхьэу КъумпIыл Мурат мэфэкI шIыкIэм тетэу псэупIэу Яблоновскэм къыщызэIуахыгъэ еджапIэу N 28-м тыгъуасэ щыIагъ. МэфэкIитIумкIэ – еджа­пIэр къызэрэзэIуахыгъэмкIэ ыкIи шIэныгъэм и МафэкIэ кIэлэегъаджэхэми, еджа­кIохэми, ахэм янэ-ятэхэми ар къа­фэгушIуагъ.

Iофтхьабзэм хэлэжьагъэх АР-м ифедеральнэ инспектор шъхьаIэу Сергей Дрокиныр, АР-м иминистрэхэм я Кабинет и Тхьаматэ игуадзэу, АР-м финанс­хэмкIэ иминистрэу Виктор Орловыр, АР-м гъэсэныгъэмрэ шIэныгъэмрэкIэ иминистрэу Евгений Лебедевыр, муниципальнэ образованиеу «Тэхъутэмы­къое районым» ипащэу Шъэо Аскэр, АР-м иминистрэхэм я Кабинет хэтхэр, муниципалитетым ипащэхэр, районым идепутатхэр, общественностыр.
«ШIэныгъэм и МафэкIэ сышъуфэгушIо! КIэлэегъаджэхэмкIи, еджакIохэмкIи, анахьэу апэрэ лъэбэкъур непэ еджапIэм чIэзыдзэщтхэмкIи, ахэм янэ-ятэхэмкIи ар мэфэкIышхоу щыт. Ахэр шIэныгъэм идунай хьалэмэт хэщагъэ хъущтых, хъу­гъэ-шIэгъэ гъэшIэгъоныбэ, текIоныгъа­кIэхэр къапыщылъых. Непэ лъэшэу ты­зы­гъэгушIорэр нэбгырэ 1100-мэ ателъы­тэгъэ еджэпIитIу а зы мафэм къызэрэзэдызэIуахырэр ары. ШIэныгъэ куу еджа­кIохэм зэрагъэгъотынымкIэ, кIэлэ­егъаджэхэм икъоу Iоф ашIэнымкIэ джырэ шапхъэхэм адиштэрэ амал пстэури яI. ЕджэпIакIэхэм кIэлэеджакIо пэпчъ икъоу анаIэ зэращытырагъэтыщтым сицыхьэ телъ», — къы­Iуагъ КъумпIыл Мурат.

АР-м и ЛIышъхьэ кIэлэеджакIохэм шIухьафтынхэр аритыгъэх. Апэрэ классхэм арыхьэгъэ пстэуми канцеляр пкъы­гъохэр зыдэлъ Iалъмэкъхэр афагъэшъошагъэх. Шъугу къэтэгъэкIыжьы «Апэрэ классым ихьагъэм пае шIухьафтын» зыфиIорэ Iофтхьабзэм диштэу Iалъмэкъ мини 6,7-рэ Адыгеим зэрэщагъэхьазырыгъэр, республикэм иеджапIэхэм яапэрэ классхэм арыхьагъэхэм ахэр зэраратыгъэхэр. Мы аужырэ илъэситIум ащ фэдэ шIухьафтынхэр тиреспубликэ Херсон хэкумкIэ Геническэ районым иеджапIэхэм яапэрэ классхэм арыхьагъэхэми ареты. Iофтхьабзэм изехьанкIэ мыгъэ IэпыIэгъу къафэхъугъ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Картонтарэмрэ» компаниеу «SFT Group» зыфиIорэмрэ.
КъумпIыл Мурат Яблоновскэм къыщызэIуахыгъэ гурыт еджапIэм икIэлэегъа­джэхэмрэ иеджакIохэмрэ адэгущыIагъ. Лъэш дэдэу зыфэныкъощтыгъэхэ еджэпIакIэр зэрафагъэпсыгъэмкIэ республикэм ипащэ зэрэфэразэхэр ахэм къаIуагъ. Корпус заулэу зэхэт еджапIэм икабинетхэм ящыкIэгъэ оборудованиер зэкIэ арыт, дэгъоу зэтегъэпсыхьагъэх, Интернетыр къызфагъэфедэнэу амал яI. Джащ фэдэу еджапIэм хэтых мастерскойхэр, спорт, актовэ залхэр, тхылъеджапIэр, шхапIэр, медпунктыр, нэмыкI псэуалъэ­хэр. Спорт джэгупIэхэри, щагури дэгъоу зэтегъэпсыхьагъэх.

Къуаджэу АдыгеякIэм къыщызэIуахыгъэ еджэпIакIэри джырэ шапхъэхэм адиштэу зэтегъэпсыхьагъ. АР-м иминистрэхэм я Кабинет и Тхьаматэу КIэрэщэ Анзаур ащ щыIагъ, АР-м и ЛIышъхьэ ыцIэкIэ шIэныгъэм и МафэкIи, еджапIэр къызэрэзэIуахыгъэмкIи къафэгушIуагъ.
Тэхъутэмыкъое районыр зызэхаща­гъэр илъэси 100 зыщыхъурэм ехъулIэу еджапIэхэр къызэрэзэIуахыгъэхэр гушIуагъоу щыт. 1924-рэ илъэсым Iоныгъом и 2-м Адыгэ хэку исполкомым хэкум районитф зэрэщызэхащэрэр ыухэсыгъагъ. ПсэупIэу Яблоновскэм дашIыхьэгъэ еджапIэр Урысыем и ЛIыхъужъэу Валерий Заволянскэм ыцIэ зыхьырэ урамым зэрэтетыр къэIогъэн фае. Мы охътэ благъэм ащ ыцIэ еджапIэм фаусыщт. Урысые Федерацием и ЛIыхъужъ ипарти ипхъэм­бгъуи ащ щызэтырагъэпсыхьагъэх. Адыгэ Республикэм и ЛIышъхьэрэ Урысые Федерацием и ЛIыхъужъ янэу Анжэла Заволянскэмрэ ахэр зэрагъэлъэгъугъэх, патриотическэ пIуныгъэм, хэушъхьафыкIыгъэ дзэ операцем хэлэжьэрэ пстэуми IэпыIэгъу ягъэгъотыгъэным мэхьанэшхо зэряIэр къыхагъэщыгъ.
«Тинепэрэ лъэхъанкIэ пшъэрылъ шъхьа­Iэу щытхэр лъэныкъо пстэуми хэшIыкI афызиIэщт, гъэсэныгъэ дэгъу зиIэщт, зихэгъэгу шIу зылъэгъурэ цIыф пIугъэныр ары. УФ-м и Президент и УказкIэ мы илъэсыр унагъом и Илъэсэу агъэнэфагъ. Нахьыжъхэр агъэлъэпIэнхэу, нахьыкIэхэм афэсакъынхэу кIэлэцIыкIу­хэр зыщагъэсэрэ унагъохэм цIыф дэгъухэр къарэтаджэх. Хэгъэгум ифедэхэм афэлэжьэнхэм, ар къаухъумэным ахэр фэхьазырых», — къыIуагъ КъумпIыл Мурат.
Еджэныр нахьышIоу зэхэщэгъэнымкIэ, къалэхэми, къуаджэхэми адэт еджапIэхэм ачIэсхэм зэфэдэ амалхэр яIэнхэмкIэ пшъэрылъэу хэгъэгум и Президентэу Владимир Путиным къыгъэуцугъэр рес­публикэм зэрэщызэшIуахырэр АР-м и ЛIышъхьэ хигъэунэфыкIыгъ.
Шъугу къэтэгъэкIыжьы федеральнэ программэхэмрэ проектхэмрэ зэрагъэцакIэхэрэм яшIуагъэкIэ мы аужырэ илъэсхэм еджэпIи 7 Адыгеим зэрэщагъэ­псыгъэр, непэ еджэпIи 3 зэрэщашIырэр: тIур нэбгырэ 1100-рэ зырызмэ ателъытагъ, зыр — нэбгырэ 250-мэ. ЕджапIэхэм ягъэцэкIэжьынкIэ федеральнэ программэр илъэсищ хъугъэ загъэфедэрэр. 2024-рэ илъэсым республикэм еджэпIи 5 щагъэ­цэкIэжьыгъ. ПстэумкIи программэм диштэу еджэпIэ 20-мэ гъэцэкIэжьын IофшIэнхэр арашIылIагъэх.
АР-м и ЛIышъхьэ ипресс- къулыкъу къытыгъэ къэбархэмкIэ
ЛIышэ Саныет.