Адыгеим ит еджапIэхэм кIэлэеджэкIо мин 61,7-рэ якIолIэжьыгъ, ахэм ащыщэу кIэлэцIыкIу мини 6-м ехъум апэрэу одыджыныр къафытеуагъ. Шъолъырым иеджапIэхэр джырэ шапхъэхэм ади­штэнхэмкIэ, шIэныгъэ куу кIэлэеджакIохэм ягъэ­гъотыгъэнымкIэ ищыкIагъэр зэкIэ республикэм щагъэцакIэ.

ИгъэкIотыгъэ гъэцэкIэжьынхэм ауж къызэIуахыжьыгъэ гурыт еджапIэу N 10-м мэфэкI Iоф­тхьабзэр зэрэщыкIуагъэр нэры­лъэгъу тфэхъугъ.
Дахэу фэпэгъэ ыкIи къэгъэгъэ Iэрамхэр зыIыгъ кIэлэеджакIохэр еджапIэм къекIолIагъэх. Мы мафэр зимэфэкI шъыпкъэр апэрэ классым ихьэхэрэр ары.
Пстэуми апэ къэзэрэугъоигъэ­хэр Урысыем ыкIи Адыгеим ягимнхэм ядэIугъэх, быракъхэр дагъэкIоягъэх.
АР-м и Къэралыгъо Совет — Хасэм идепутатэу Марина Плаховар мэфэкI мафэмкIэ къэ­зэрэугъоигъэхэм къафэгушIуагъ. Мы еджапIэм ежьыри зэрэчIэсыгъэр къыIуагъ, кIэлэцIыкIухэм яегъэджэнкIэ ищыкIэгъэ пстэури яIэ, аужырэ шапхъэхэм адиштэрэ еджапlэ зэрэхъугъэр игуапэу къыхигъэщыгъ.
— Федеральнэ къэралыгъо программэхэм яшIуагъэкIэ рес­публикэм ит гурыт еджапIэхэр, кIэлэцIыкIу IыгъыпIэхэр агъэ­кIэжьых, кIэу ашIых. ШIэныгъэ куу кIэлэеджакIохэм зэрагъэгъо­тыным фэшI ящыкIагъэр зэкIэ аIэкIэлъ. ИгъэкIотыгъэ гъэцэ­кIэжьынхэм ауж еджапIэм хэхъо­ныгъэхэр зэришIыщтхэм тицыхьэ телъ. Шъуигъэхъагъэхэм шъуа­къы­щымыуцоу, ыпэкIэ шъулъыкIотэнэу шъуфэсэIо, — къы­Iуагъ депутатым.
ЕджапIэм ипащэу Наталья Жарковам къэзэрэугъоигъэхэм къафэгушIуагъ ыкIи яеджапIэ зэрэзэтырагъэпсыхьагъэмкIэ АР-м и ЛIышъхьэ, Мыекъопэ къэлэ администрацием ипащэ ыкIи хэбзэ гъэцэкIэкIо къулыкъу­хэм зэрафэразэр къыIуагъ. ГъэхъэгъэшIухэр ашIыхэзэ яIоф­шIэн зэрэлъагъэкIотэщтыр къыхигъэщыгъ.
ИгъэкIотыгъэ гъэцэкIэжьынхэм ауж еджапIэм ипчъэхэр къызэlуи­хыжьыгъэх, зэрагъэкIэжьыгъэм дакIоу шэпхъэшIухэм адиштэ, гъэсэныгъэ тедзэм нахь фытегъэпсыхьагъэ хъугъэ. Ащ ишIуа­гъэкIэ яlофшlэн зэхъокIыныгъэ­хэр фэхъущтых. Зэхахьэхэр зы­щырагъэкIокIыщт зал ин джы яI, чIэхьапIэм нахь зырагъэушъом­бгъугъ. Джащ фэдэу еджапIэм музей хэтыщт. Афганистан, Чэ­­чэным ащыкIогъэ заохэм, хэушъхьа­фыкIыгъэ дзэ операцием лIы­хъужъныгъэ щызэрахьэзэ фэхыгъэхэу мы гъэсэныгъэм иучреждение къэзыухыгъэхэм ар афэгъэхьыгъэщт. ЕджапIэм зэкIэмкIи нэбгырэ 617-рэ щеджэ, ахэм ащыщэу 61-р апэрэ классым ихьагъ.
Нэужым кIэлэеджэкIо цIыкIухэм тхьапэм хэшIыкIыгъэ къухьэлъатэхэр аратыгъэх, усэхэр къаIуагъэх, къэшъуагъэх. АР-м и Лlышъхьэ ишlухьафтынхэр аратыгъэх.
КIэлэеджэкIо цIыкIухэр яклассхэм ачIэхьагъэх. Апэрэ классыр зыштэгъэ Фаина Волобуевам къызэрэтиIуагъэмкIэ, апэрэ урокым лъэныкъо шъхьаIэхэм щатегущыIэщтых, гурыт еджапIэм нэIуасэ зыщыфашIыщт.
ИлъэсыкIэ еджэгъумкIэ кIэлэеджакIо­хэми, кIэлэегъаджэхэми, ны-тыхэми тафэгушIо.
ДЕЛЭКЪО Анет.