ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм ыпкIэ зыхэмылъ юридическэ IэпыIэгъу ягъэгъотыгъэным фэгъэхьыгъэ зэхэсыгъо АР-м и Очылхэм япалатэ щыкIуагъ.

Iофтхьабзэм хэлэжьагъэх Адыгэ Рес­публикэм и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, АР-м и Апшъэрэ хьыкум итхьаматэу Шумэн Байзэт, Мыекъопэ гарнизоным идзэ хьыкум итхьаматэу Валерий Саламатиныр, АР-м и Къэралыгъо Совет – Хасэм и Тхьаматэ игуадзэу Цэй Эдуард, Къэралыгъо фондэу «Хэгъэгум иухъума­кIохэр» зыфиIорэм икъутамэу Адыгеим щыIэм ипащэу ПIатIыкъо Аслъан, Адыгеим и Нотариальнэ палатэ ипрезидентэу Мырзэкъулэ Батыр, Адыгеим и Очылхэм япалатэ ипрезидентэу, Урысые общественнэ организациеу «Урысыем июристхэм я Ассоциацие» и Адыгэ шъолъыр къутамэ игъэцэкIэкIо комитет ипащэу Мамый Алый, нэмыкIхэри.
Iофтхьабзэр зэрищагъ Урысые общественнэ организациеу «Урысыем июристхэм я Ассоциацие» и Адыгэ шъолъыр къутамэ итхьаматэу ЛIыхьэтыкъо Аскэр.
Адыгеим и ЛIышъхьэу КъумпIыл Мурат ыцIэкIэ Владимир Свеженец шIу­фэс гущыIэмкIэ къекIолIагъэхэм закъыфигъэ­загъ. Ащ къыIуагъ шъолъырым ипащэ дзэ къулыкъушIэхэм ыкIи ахэм яунагъо­хэм лъэшэу ынаIэ зэратыригъэтырэр. ХэушъхьафыкIыгъэ дзэ операциер къызежьагъэм щыублагъэу дзэ къулыкъу­шIэхэм ыкIи ахэм яунагъохэм IэпыIэгъу афэхъугъэным ыкIи ящыкIэгъэ техникэр къафащэфыным Адыгеим ибюджет къы­хэхыгъэ сомэ миллиард 1,8-рэ апэIуагъэхьагъ.
В. Свеженец къызэриIуагъэмкIэ, Адыгеим икIыгъэхэу хэушъхьафыкIыгъэ дзэ операцием хэлажьэхэрэр ягупсэхэм алъэныкъокIэ рэхьатэу щэрэтых, ахэм ягумэкIыгъохэм язэшIохынкIэ хабзэр амалышIоу щыт. Чэщ-зымафэм къы­кIоцI зэпыу имыIэу хэушъхьафыкIыгъэ дзэ операцием хэлажьэхэрэм яунагъохэм Адыгеим ихэбзэ къулыкъухэр IэпыIэгъу афэхъух: унагъом ищыкIагъэм къыщегъэжьагъэу юридическэ упчIэхэм язэхэфынкIэ, субсидиехэр аратынхэмкIэ, банкым ичIыфэу ателъхэр охътэ пIалъэ­кIэ афызэкIэхьэгъэнымкIэ, нэмыкIхэмкIи адэIэпыIэх.
КъэIогъэн фае Фондэу «Хэгъэгум иухъумакIохэр» зыфиIорэм икъутамэ Адыгеим зэрэщагъэпсыгъэм ишIогъэшхо къызэрэкIуагъэр.
— Непэ къутамэм иIофшIэн зэхищэнымкIэ амал дэгъухэр IэкIэлъых. IэпэIэсэныгъэ зиIэ Iоф­шIакIохэр мыщ щэлажьэх, фондым ипащэ опыт гъэнэфагъэ зиIэ гъэIорышIакIу. Ащ ишIуа­гъэкIэ бгъу пстэури къыдалъы­тэзэ IофшIэнышхо агъэцакIэ, къяуалIэхэрэр джэуапынчъэу Iуа­гъэкIыжьхэрэп, зэрищыкIа­гъэу ягумэкIыгъохэр афызэхафых, — къыIуагъ Владимир Свеженец.
Нэужым зиIофшIэнкIэ къахэщыгъэхэм щытхъу тхылъхэр аритыжьыгъэх. Адыгэ Республикэм и ЛIышъхьэ и Рэзэныгъэ тхылъ афагъэшъошагъ Адыгеим и Очыл­хэм япалатэ ивице-президентэу Щыкъ Раситэ, очылхэм я Адыгэ респуб­ликэ коллегие иочылхэу Ирина Константиновам, Зарина Скрябинам, Кощхьэблэ районым щыIэ къутамэу N 6-м ипащэу Анатолий Наголевым, Джэджэ районым иочылхэм яколлегиеу «Статус» зыфи­Iорэм итхьаматэу Александр Ломешиным.
ЛIыхьэтыкъо Аскэр къызэриIуагъэмкIэ, Урысыем июристхэм я Ассоциацие и Адыгэ шъолъыр къутамэрэ фондэу «Хэгъэгум иухъумакIохэр» зыфиIорэм икъу­тамэу Адыгеим щыIэмрэ зэзэгъыныгъэ зэрэзэдашIыгъэм тетэу Iоф зэдашIэ.
— Зэзэгъыныгъэм тыкIэтхэным ыпэ Урысыем июристхэм я Ассоциацие икъутамэхэм, очыл палатэхэм ыкIи Фондэу «Хэгъэгум иухъумакIохэр» зыфиIорэм икъутамэу нэмыкI шъолъырхэм ащыIэхэм яIофшIэнкIэ опытэу аIэкIэлъым зыщыдгъэгъозагъ. Мыщ хахьэу шIуагъэ къытэу Iоф зыдэтшIэщт лъэныкъохэр дгъэ­нэфагъэх, фондым къакIохэрэм упчIэу яIэхэр псынкIэу ыкIи зэрищыкIагъэм фэдэу афэдгъэцэкIэнхэм тыпылъ, — къыIуагъ ащ.
ТикъэралыгъокIэ зыфэдэ щымыIэ шIыкIэу агъэфедэрэр тхьамафэм къыкIоцI очылхэр Фондэу «Хэгъэгум иухъу­макIохэр» зыфиIорэм икъутамэ дежурствэ зэращахьырэр ары. Шъолъырхэм ащыщыбэхэм ыпкIэ зыхэмылъ юридическэ IэпыIэгъур телефонымкIэ афагъэ­цакIэ.
ЛIыхьэтыкъо Аскэр игущыIэ икIэухым юридическэ сообществэм ыцIэкIэ Адыгеим и Нотариальнэ палатэ ипрезидентэу бэмышIэу хадзыгъэ Мырзэкъулэ Батыр фэгушIуагъ.
АР-м и Апшъэрэ хьыкум итхьаматэу Шумэн Байзэт къызэриIуагъэмкIэ, шъо­лъырым ихьыкумышIхэр хэушъхьафыкIыгъэ дзэ операцием хэлажьэхэрэм ыкIи ахэм яунагъохэм ялъэIу тхылъ 30-м ехъумэ ахэплъагъэх. РеспубликэмкIэ мы пчъагъэр бэшхоп ыкIи ащ къегъэлъагъо упчIэхэм язэхэфын нахьыбэрэмкIэ хьыкумыр къыхэмыхьэу зэрэзэшIуа­хырэр.
Нэужым Адыгеим ихьыкумхэм я Совет ищытхъу тхылъхэр Адыгеим и Очылхэм япалатэ итхьаматэу Мамый Алый, джащ фэдэу очылхэу Ирина Гребенщиковам ыкIи Талъэкъо Нурбый аритыжьыгъэх.
АР-м и Къэралыгъо Совет — Хасэм итхьаматэ игуадзэу Цэй Эдуард къыкIигъэтхъыгъ ыпкIэ зыхэмылъ юридическэ IэпыIэгъур арагъэгъотыным фытегъэ­псыхьэгъэ унашъо Адыгеим зэрэщаштагъэр, ащ анахьэу къыдыхэлъытагъ хэ­ушъхьафыкIыгъэ дзэ операцием хэла­жьэхэрэр ыкIи ахэм яунагъохэр. Мыщ дэжьым къэIогъэн фае фондым икъутамэ епхыгъэу къяуалIэхэрэм ыпкIэ зыхэмылъ юридическэ IэпыIэгъур аратынымкIэ федеральнэ ыкIи шъолъыр фэгъэкIотэны­гъэу щыIэхэм ащагъэгъуазэх, ахэр къаратыным фэшI ищыкIэгъэ тхьапэхэр афагъэпсых. АщкIэ Адыгеим и Очылхэм япалатэрэ фондым икъутамэрэ Iофышхо зэрэзэшIуахырэр депутатым къыхигъэщыгъ.
Нэужым республикэ Парламентым ищытхъу тхылъхэр очылэу Делэкъо Хьилым, ыпкIэ зыхэмылъ юридическэ IэпыIэгъур ягъэгъотыгъэнымкIэ Адыгеим и Очылхэм япалатэ епхыгъэ мыкъэралыгъо гупчэм итхьаматэу Юлия Ермолинам, очылхэу ТхьалI Айдэмыррэ Алексей Садковымрэ аритыжьыгъэх.
Фондэу «Хэгъэгум иухъумакIохэр» зыфи­Iорэм икъутамэу Адыгеим щыIэм ипащэу ПIатIыкъо Аслъан къызэриIуагъэмкIэ, яIоф­шIэн зырагъэжьагъэм къыщегъэжьагъэу лъэIу тхылъ мини 6 фэдиз къаIэкIэхьагъ, ащ ипроцент 86-р агъэцэкIагъ, къэнагъэхэм Iоф адашIэ. Юридическэ мэхьанэ зиIэ лъэIу тхылъэу къа­тыгъэр 600 фэдиз мэхъу. Ахэм язэшIохынкIэ Адыгеим ихэбзэ къулыкъухэм, Урысыем юстициемкIэ и Министерствэ и ГъэIорышIапIэу Адыгеим щыIэм ыкIи Адыгеим и Очылхэм япалатэрэ Урысыем июристхэм я Ассоциацие и Адыгэ шъолъыр къута­мэрэ IэпыIэгъушхо къа­фэхъух.
Фондэу «Хэгъэгум иухъумакIохэр» зыфиIо­рэм и Тхьаматэу Анна Цивилевар зыкIэтхэжьыгъэ рэзэныгъэ тхылъхэр Мамый Алый, Пщыдатэкъо Жаннэ, Ирина Шумиловам ыкIи Блэ­гъожъ Азэмат аратыжьыгъэх.
Iофтхьабзэм къыщыгущыIагъ Адыгеим и Очылхэм япалатэ ивице-президентэу Щыкъ Раситэ. Ащ къыIуагъ гъэрекIо шъолъырым и Очылхэм япалатэрэ фондым икъутамэрэ зэзэгъыныгъэм зэрэзэдыкIэтхагъэхэр. Ащ пшъэрылъ шъхьаIэу иIэр ыпкIэ зыхэмылъ юридическэ IэпыIэгъур зищыкIагъэхэм ягъэгъотыгъэныр ыкIи фитыныгъэу яIэхэм ащыгъэгъозэгъэнхэр ары.
— Очылхэр жэрыIокIэ ыкIи тхы­гъэ шIыкIэмкIэ упчIэжьэгъу афэхъух, ищыкIагъэмэ ыпкIэ хэмылъэу хэбзэ къулыкъухэм ялIыкIохэм е хьыкумышIхэм аIуагъа­кIэх, — къыIуагъ Щыкъ Раситэ.
Зэзэгъыныгъэу ашIыгъэм очыл нэбгыри 112-рэ хэлажьэх, ахэм ащыщэу 67-р – Мыекъуапэ, адрэ 45-р Адыгеим ирайонхэм ащыIэх. ЗэкIэмкIи нэбгырэ 542-мэ ыпкIэ зыхэмылъ юридическэ IэпыIэгъур арагъэгъотыгъ.
Ащ нэмыкIэу Очылхэм япалатэ хэушъхьафыкIыгъэ линие стырыр къыщызэIуа­хыгъ, ащ нэбгыри 103-мэ яупчIэхэр щызэхафыгъэх.
Мамый Алый къызэриIуагъэмкIэ, тапэкIи очылхэм яIофшIэн зэрагъэлъэшыщтым пылъыщтых. Джащ фэдэу Адыгеим иочылхэм хэбзэшIу афэхъугъэу ыпкIэ зыхэмылъ юридическэ IэпыIэгъум хэмытэу цIыфхэм яхэбзэ фитыныгъэхэр ашIэнхэмкIэ упчIэжьэгъу афэхъух.
КIарэ Фатим.