Iоныгъом партхэм адэтIысхьащт, колледжым е апшъэрэ еджапIэм япчъэ­шъхьаIу зэпызычыщт пстэуми гъэшIэгъоныбэ къяжэ, шIэныгъэм нэмыкIэу, хъугъэ-шIэгъэ зэфэшъхьафхэм ахэлэ­жьэнхэ, кIэ горэхэм нэIуасэ зафашIын амал ахэм яIэщт. ЦIыфым ищыIэныгъэ егъэшIэрэу а пстэури къыхэнэщт.
ШIэныгъэм хэтрэ цIыфи ищыIэныгъэ чIыпIэшхо щеубыты: лъэныкъуабэмэ афыриIэ хэшIыкIым хэхъо, идунэе­еплъыкIэ нахь зеушъомбгъу, щыIэныгъэм къыхэхъухьэрэ хъугъэ-шIагъэхэм екIолIэкIэ гъэнэфагъэ афыриIэ хъуным­кIи ар лъэпсэшIоу щыт. Урысые Федерацием и Президентэу Владимир Путиным къызэрэхигъэщыгъэу, «къэра­лыгъом инеущырэ мафэ зыфэдэщтыр анахьэу зэпхыгъэхэм ащыщых гъэсэны­гъэу цIыфым зэригъэгъотыгъэр зынэсырэр, технологиеу агъэфедэхэрэр зыфэдэхэр ыкIи хэти игухэлъ дахэхэр пхырищынхэмкIэ теубытагъэу иIэр».
Адыгэ Республикэм къыткIэхъухьэрэ кIэлэцIыкIухэм, хабзэ зэрэхъугъэу, лъэныкъо пстэумкIи хэхъоныгъэ ашIыным лъэшэу анаIэ щатырагъэты. Рес­публикэм еджэпIакIэхэр щашIых, жъы хъугъэхэр щагъэцэкIэжьых, гъэсэныгъэм иучреждениехэр мылъкумкIи, техникэмкIи нахь зэтырагъэпсыхьэх.
Тэ гухэлъэу тиIэр республикэм щыпсэурэ кIэлэцIыкIухэм гъэсэныгъэ дэгъу ягъэгъотыгъэнымкIэ, щыIэ­ны­гъэм илъэныкъо зэфэшъхьафхэм яшIуагъэ къыщагъэкIонымкIэ, Адыгеим ыкIи ти Хэгъэгушхо яфедэ зыхэлъ Iоф­шIэным гъэхъагъэхэр щашIынхэмкIэ тадеIэныр ары.
Мы мэфэкI шIагъом кIэлэеджакIохэм ыкIи студентхэм тафэлъаIо ягу­хэлъ дахэхэр къадэхъунхэу, еджэным гъэхъэгъэшхохэр щашIынхэу. Анахьэу апэрэ классым кIуагъэхэр ары тызыфэгушIохэрэр. А илъэс еджэгъухэр федэ афэхъунхэу, лъэныкъо пстэумкIи гъэхъагъэхэр ашIынхэм иамал яIэнэу, ныбджэгъубэ зэрагъэгъотынэу, агу къинэжьыщт хъугъэ-шIагъэхэм ащымыкIэнхэу афэтэIо! КIэлэегъаджэхэм тафэлъаIо яIофшIэн шIуагъэ къытэу зэхащэнэу, яIэпэIэсэныгъэ хагъэхъо­нэу, ны-тыхэм — якIэлэцIыкIухэм арыгушхонхэм пае ушъхьагъубэ щы­Iэнэу!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъо­лъыр къутамэ и Секретарэу
КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу
Владимир Нарожнэр