ГъомылэпхъэшIынымкIэ ыкIи къыдэгъэкIыжьынымкIэ республикэ предприятиехэм яIофшIэн зэрэзэхащэрэм зыщытегущыIэгъэхэ зэIукIэу Адыгэ Республикэм и ЛIышъхьэ и Координационнэ гупчэ щыкIуагъэр КъумпIыл Мурат зэрищагъ.

ЗэIукIэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, министрэхэм я Кабинет и Тхьаматэ игуадзэу ЛIыхэсэ Махьмуд, министрэхэм я Кабинет и Тхьаматэ игуадзэу, АР-м финансхэмкIэ иминистрэу Виктор Орловыр, экономикэ хэхъоныгъэмрэ сатыумрэкIэ министрэу Шэуджэн Заур, мэкъу-мэщымкIэ ми­нистрэу Къуанэ Анзаур, гъэсэныгъэм-
рэ шIэныгъэмрэкIэ иминистрэу Евгений Лебедевыр, АР-м и Гупчэу экспортымкIэ IэпыIэгъу афэхъурэм, чIыфэт учреж­дениехэм, муниципалитетхэм, респуб­ли­кэм гъомылэпхъэшIынымкIэ ыкIи къы­дэгъэкIыжьынымкIэ ипредприя­тиехэм япащэхэр.
АР-м и ЛIышъхьэ дэгъоу Iоф зэрашIагъэм фэшI Iофтхьабзэм хэлажьэхэрэм зэрафэразэр, гъомылэпхъэшIынымкIэ, къыдэгъэкIыжьынымкIэ зэфэхьысыжьхэр непэ зэрашIын, пшъэрылъыкIэхэр зэрагъэуцунхэ фаер къыIуагъ.
«ГъомылэпхъэшIынымрэ къыдэгъэ­кIыжьынымрэ тиреспубликэ илъэныкъо шъхьаIэхэм ащыщых, Адыгеим щыпсэурэ нэбгырэ мини 8,5-м ехъу ахэм ащэ­лажьэ. Экономикэм илъэныкъо пэрыт-
хэм ащыщым хэхъоныгъэ егъэшIыгъэнымкIэ ищыкIэгъэ амалхэм тинепэрэ зэIукIэ тыщяусэщт, тиеплъыкIэхэр къыщызэфэтIотэщтых, мы лъэныкъомкIэ IофшIагъэу щыIэхэр щызэфэтхьысыжьыщтых, ткIуачIэ тапэкIэ зэтхьылIэщтхэр щыдгъэнэфэщтых», — къыIуагъ КъумпIыл Мурат.
ГъэрекIо сомэ миллиард 51-м ехъу зыосэ продукциеу республикэм къыщахьыжьыгъэр зэрэIуагъэкIыгъэр зэ­Iу­кIэм щыхагъэунэфыкIыгъ. Гъомылап­хъэхэм якъыдэгъэкIынкIэ индексыр про­­центи 120,8-рэ, шъонхэмкIэ — проценти 104-рэ хъугъэ.
Урысые Федерацием и Президентэу Владимир Путиным и Указэу 2030-рэ, 2036-рэ илъэсхэм анэс хэгъэгум хэхъо­ныгъэу ышIыщтхэм афэгъэхьыгъэм къы­щыдэлъытэгъэ шапхъэхэр зэрагъэца­кIэхэрэр шъхьафэу зэIукIэм щыхагъэу­нэфыкIыгъ. 2021-рэ илъэсым егъэпшагъэмэ, Адыгеим иагропромышленнэ комплекс продукциеу къыщыдагъэкIырэм процент 25-кIэ, IэкIыб къэралыгъо­хэм аIэкIагъахьэрэр фэди 1,5-кIэ, инвестициехэм процент 60-кIэ закъырагъэ­Iэтын фаеу хъущт.
АР-м мэкъу-мэщымкIэ иминистрэу Къуанэ Анзаур зэIукIэм къызэрэщиIуагъэмкIэ, мы аужырэ илъэси 3-м сомэ миллиард 42156-м нэс зыосэ гъомылапхъэхэр, миллиарди 9,53-м нэс зыосэ шъонхэр республикэм ращыгъэх. Предпринимательствэ цIыкIумрэ гурытымрэ апылъхэр хэмытхэу, инвестициехэу гъэрекIо къахалъхьагъэр мыщ фэдиз: гъомылапхъэхэм якъыдэгъэкIын пэIу­хьагъэр сомэ миллиард 1,4-рэ, шъонхэм — сомэ миллион 314-рэ.
Къэралыгъо IэпыIэгъу зэфэшъхьафэу къаратыхэрэр, фэгъэкIотэныгъэ зиIэ чIыфэхэр, Урысые экспорт гупчэм IэпыIэгъоу къаритырэр икъоу къызэрэзфагъэфедэн, сэнашъхьэхэм якъэгъэ­кIын­рэ сэнэшIынымрэ нахь зызэрэрагъэу­шъомбгъун фаер шъхьафэу зэIукIэм къыщаIуагъ.
Къуаджэхэм Iоф ащызышIэхэрэм унэ­хэр афэшIыгъэнхэмкIэ республикэм гу­хэлъышхохэр зэриIэхэр Iофтхьабзэм къыщыхагъэщыгъ.
Адыгеим и ЛIышъхьэ зэIукIэм хэла­жьэхэрэм къяджагъ федеральнэ гупчэм къыгъэхьазырырэ программэхэм шIуагъэу къатыщтым джыри зэ хэплъэжьынхэу ыкIи амал зэриIэкIэ ахэр нахь икъоу къызфагъэфедэнхэу. Къэралыгъо программэу «Зэдиштэу къуаджэхэм хэхъоныгъэ ягъэшIыгъэныр» зыфиIорэм нахь лъэшэу анаIэ зэрэтырагъэтын фаер ащ къыIуагъ. Джащ фэдэу хэбзэIахьхэр зэратыралъхьэрэм, АПК-м иIофышIэхэм ялэжьапкIэ къэIэтыгъэным япхыгъэ Iофыгъохэми атегущыIагъэх.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.