Зипсауныгъэ пыч фэхъугъэхэм яя V-рэ фестивалэу «Просто любить» зыфиIорэр къалэу Пятигорскэ щыкIуагъ.

ЦIыфэу зипсауныгъэ зэщыкъуагъэхэм сэнаущыгъэ зыхэлъэу ахэтхэр къыхэгъэ­щыгъэнхэр, тапэкIэ ахэм ятворчествэ зырагъэушъомбгъун амал ятыгъэныр ары пшъэрылъ шъхьаIэу Iофтхьабзэм иIэр.
Ставропольскэ ыкIи Краснодарскэ крайхэм, Московскэ, Воронежскэ, Волгоградскэ хэкухэм, Къэрэщэе-Черкес ыкIи Адыгэ республикэхэм, Темыр Осетием — Аланием къарыкIыгъэхэу нэбгыри 150-рэ фестивалым хэлэжьагъ. КIэщакIо фэхъугъэхэр ыкIи зэхэзыщагъэр Кристина Радионовамрэ Любовь Шармашрэ.
ИлъэситIукIэ узэкIэIэбэжьмэ, фестивалым урысые мэхьанэ иIэ хъугъэ, джы ащ зеушъомбгъу, спонсорэу, кIэщакIоу иIэхэм ахэхъо, хэлажьэхэрэм япчъагъэ нахьыбэ мэхъу. Мыгъэ «Вокал», «Хореография», «Театральное мастерство», «Инструментальное творчество, «Художественное слово», «Оригинальный жанр» зыфиIорэ лъэныкъохэмкIэ артистхэм яIэпэIэсэныгъэ къагъэлъэгъуагъ. ЗэкIэмкIи номер 50-мэ жюрир ахэдагъ.
Фестивалыр къызэIуихыгъ хьафизэхэм е дэеу зылъэгъухэрэм, сэкъатныгъэ зиIэхэм я Урысые обществэхэм я Адыгэ республикэ организациехэм зэдызэхащэгъэ хорэу «Надежда» зыфиIорэм. Ащ ипащ С.И.Тишанскэр.
Ащ нэмыкIэу, хьафизэхэм е дэеу зылъэгъухэрэм я Урысые обществэ и Адыгэ республикэ организацие ыцIэкIэ фестивалым хэлэжьагъэх ащ ивокальнэ студиеу «Сувенир» зыфиIорэр, Мыекъуа­пэкIэ ащ фэдэ чIыпIэ организацием хэтхэу Владимир Хурс, Игорь Патрий, Ирина Желябинар. Вокальнэ зэнэкъо­къум хэлэжьагъ Мыекъопэ районымкIэ организацием хэтэу Юлия Цымбаловар, «Художественное слово» зыфиIорэ лъэ­ныкъомкIэ иIэпэIэсэныгъэ къыгъэлъэ­гъуагъ а зэнэкъокъум хэлэжьагъэхэм анахьыкIэу, илъэс пшIыкIубгъу зыныбжь Диана Зайцевам.
Адыгеим икIыгъэхэм осэ ин къафа­шIыгъ. «Надеждэм» лъэныкъуитIумкIэ, народнэ ыкIи эстраднэ вокалхэмкIэ, апэрэ чIыпIэхэр къыхьыгъэх, Юлия Цымбаловам эстраднэ вокалымкIэ я 2-рэ шъуашэ зиIэ диплом къыфагъэ­шъошагъ. Ирина Желябинами а лъэныкъомкIэ ящэнэрэ чIыпIэр къыхьыгъ. Апэрэ шъуашэ зиIэ дипломхэр къа­фагъэшъошагъэх Владимир Хурс ыкIи Игорь Патрий. Диана Зайцевам «Художественное слово» зыфиIорэ лъэны­къомкIэ ящэнэрэ чIыпIэр ыубытыгъ.
Фестивалым хэлэжьагъэхэм къалэм ичIыпIэ дахэхэр къарагъэлъэгъугъэх, музей-къэгъэлъэгъон комплексэу «Россия – моя история» зыфиIорэм ащэгъа­гъэх.
ТекIоныгъэ къыдэзыхыгъэхэм «Вод­ник» зыфиIорэ паркым Гала-концерт къыщатыгъ. А чIыпIэ дэдэм интерактивнэ площадкэхэр къыщызэIуахыгъагъэх, аниматорхэм Iоф щашIагъ, мастер-классхэр ащыкIуагъэх.