Адыгеим диспансеризациер щэкIо. АР-м псауныгъэр къэухъумэгъэнымкIэ и Министерствэ къызэритыгъэмкIэ, 2024-рэ илъэсыр къызихьагъэм щыублагъэу нэбгырэ мин 94-мэ япсауныгъэ изытет ауплъэкIугъ.

Нахьыбэу лъыр пкъышъолым къызэрэщекIокIырэм, жьы къэщапIэхэм, гум, лъынтфэхэм япхыгъэ ыкIи адэбз узхэр ары къахагъэщыхэрэр.
— Узыр игъом къыхагъэщынышъ еIэзэнхэм пае псауныгъэм изытет уплъэ­кIугъэным мэхьанэшхо иI. Арышъ, ар Iэпэдэлэл пшIы хъущтэп. IофшIэнымкIэ Кодексым къызэрэдэлъытагъэмкIэ, пащэхэм яIофышIэхэм диспансеризациер акIуным пае, илъэс 40-м зыныбжь нэмысыгъэхэм илъэсищ пэпчъ, ащ зы­ныбжь шIокIыгъэхэм илъэс къэс зы дэсыгъо мафэ ыпкIэ афатхызэ къаратын фае, — къыщаIуагъ Министерствэм.
Псауныгъэм иуплъэкIун иапэрэ едзыгъо цIыфым псэукIэу иIэм къыкIэупчIэх, илъэгагъэ, къыщэчырэр, ыпчанэ зыфэдизыр, идавление ашых, флюорографиер, ЭКГ-р рагъэкIу, нэ кIоцIым илъы­дэкIуае зыфэдизыр зэрагъашIэ, терапевтыр, нэмыкI специалистхэр еплъых, лъы рагъэты, гепатит C иIэмэ зэра­гъашIэ.
Узтещыныхьан горэ къыхагъэщыгъэмэ, уплъэкIунхэм яятIонэрэ уцугъо къыдыхэ­лъытагъэу, диагнозыр тэрэзэу агъэуцуным фэшI, нахь куоу псауныгъэм изытет зэрагъашIэ, ищыкIэгъэ специалистхэм адэжь агъакIо.
Сурэтыр: Iэшъынэ Аслъан.