УФ-м и Президентэу Владимир Путиныр чIыгу Iахьэу амыгъэ­федэхэрэм афэгъэ­хьыгъэ хэбзэгъэуцугъэм кIэтхагъ. Ащ фэдэ амыгъэкощырэ мылъку зиIэу, зыпари тыри­мышIыхьэу е къыщи­мыгъэкIэу зыбгы­нэжьы­гъэхэм чIыгур хьаулыеу щамыгъэлъынэу, ар тапэкIэ агъэфедэным фагъэхьазырынэу уахътэ къареты.

2025-рэ илъэсым игъэтхапэ и 1-м хэбзэгъэуцугъэм кIуачIэ иIэ хъущт. Ащ къызэрэщиIорэмкIэ, псэупIэ гъунэм е чъыгхэтэ товариществэм чIыгу Iахь щызэзгъэгъотыгъэхэм илъэсищым къыкIоцI ар агъэкъэбзэнышъ, псэуалъэ тырагъэуцонэу е алэжьынэу ыуж ихьанхэ фае.
НахьыпэкIэ чIыгу Iахь зиIэ­хэм ар зэрагъэфедэщтымкIэ шэпхъэ гъэнэфагъэ хэбзэгъэуцугъэм къытыщтыгъэп. Ащ ыпкъ къикIыкIэ зэхэкIыхьагъэу, хэкIыр хизэу чIыгоу щылъым ипчъагъэ хахъощтыгъ, псэуалъэ горэ тыришIыхьанэу езыгъэжьагъэми илъэс пчъагъэхэм ар ымыухэу щигъэлъыщтыгъ. Джы хэбзэгъэуцугъэм мы Iофыгъор дегъэзыжьы ыкIи ащ фэдэу абгынэжьыгъэ чIыгу Iахьхэм ягъунэгъоу псэухэрэм яфитыныгъэхэр къеухъумэх.
— Илъэсищым чIыгур зием ыгъэкъэбзэн, ыупкIэн, ищыкIагъэмэ, ыгъэгъушъын, зэщизы ышIын фае. А пIа­лъэр зытекIырэм ыуж унэ, тучан е нэмыкI псэуалъэ тыригъэуцонэу ригъэжьэн фит. ЧIыгу Iахьыр зием ар ыгъэфедэным пае зэшIуихын фэе Iофтхьабзэхэм яспискэ УФ-м и Правительствэ къы­гъэнэфэщт, — къыIуагъ Росреестрэм АР-мкIэ и ГъэIорышIапIэ ипащэу Марина Никифоровам.
ЧIыгу Iахьыр къэзыщэфыгъэм ащ ищыкIэгъэ тхылъхэр зигъэхьазырхэрэм ыуж имылъку ыгъэфедэнэу фитыныгъэ иIэ мыхъугъэмэ, зэрэзекIощтыри мы хэбзэгъэуцугъэм итхагъ. ЧIыгур хэбзэгъэуцугъэм диштэу зэрамыгъэфедэрэр къэзыгъэ­лъэгъощт шапхъэхэр зыщытхыгъэ унашъом ипроекти УФ-м и Правительствэ егъэ­хьазыры.
Абгынэжьыгъэ чIыгу Iахьхэр узыгъэгумэкIын Iоф зэрэхъугъэхэр ахэм апэблагъэу псэухэрэм дэгъоу ашIэ. Сыда пIомэ ахэм уц шIоеу къытекIэхэрэм чIыпIэм итеплъэ къызэрамыгъэдахэрэм имызакъоу, зэрарэу къахьырэр макIэп. Хэбзэгъэуцугъа­кIэм ар дигъэзыжьыщт. ЧIыгур зыщэфыгъэм зэрищыкIагъэм тетэу ыгъэфедэным, санитар шапхъэхэр ымыукъонхэм, гъунэгъухэм иягъэ аримыгъэкIыным ар фэIорышIэщт.
ХЪУТ Нэфсэт.