2024-рэ илъэсым игъэ­мафэ жъоркъэу икIыгъ, шыблэ ыкIи ошъу хэтэу макIэу ощх къещхыгъ. ГурытымкIэ температурэр илъэсыбэхэм ащыIэгъэ фабэм градусрэ ныкъорэкIэ, тIукIэ шъхьадэкIыгъ.
ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм ипащэу Александр Митровым тызэрэщигъэгъозагъэмкIэ, мэфэ фабэхэм апкъ къикIэу шышъхьэIу мазэм Адыгеим машIо къыщыхъуным ищынагъо щыIагъ. Ощхэу къещхы­гъэр шапхъэхэм ашIокIыгъэп. Мэкъу-мэщым икъиныгъохэм ащыщыгъ огъур.
Iоныгъоу илъэсым ианахь мэзэ дэгъукIэ алъытэрэр къехьэ. Фабэр нахь зэкIакIоу ригъэжьагъ. Мафэхэр гъэмафэм фэдэу фэбэщтых, пчыхьэрэ ыкIи пчэдыжьыпэрэ бжыхьэм фэдэу чъыIэтэгъэщт. АдыгеимкIэ бжыхьэм иапэрэ мазэ гъэмафэр джыри лъыкIуатэу къыпщэхъу. Ащ къыхэкIэу а мазэм «бабье лето» раIо.
2024-рэ илъэсым Iоныгъом 22-м чэщым икIыхьагъэ хэхъонэу регъажьэ. Тыгъэгъазэм и 21-м нэс мафэмрэ чэщымрэ якIыхьагъэ зэфэдиз хъущт.
Мазэр фабэу ыкIи гъушъэу икIыщт. ГурытымкIэ температурэу щыIэщтыр шапхъэхэм ашIокIыщтэп, ощхэу къещхыщтыр шапхъэу щыIэхэм анахь мэкIэщт. Апэрэ, ятIонэрэ ыкIи ящэнэрэ мэфипшIым макIэу ощх къещхын ыкIи пщагъоу щытын ылъэкIыщт.
Апэрэ мэфипшIыр: чэщым фабэр градус 15 — 20, мафэм градус 25 — 30-рэ щыIэщт, къы­хэкIыщтых фабэр градус 33 — 35-м зыщынэсыщтхэр.
ЯтIонэрэ мэфипшIыр: чэщым фабэу градус 11 – 16, мафэм градус 21 — 26-рэ щыIэщт. Градус 30-м зыщынэсыщтхэри къыхэкIыщтых.
Ящэрэ мэфипшIыр: чэщым фабэу градуси 8 — 13, мафэм градус 18 — 23-м акIэ­хьащт. Iоныгъом ыкIэхэм къушъхьэхэм къа­щигъэщтын ылъэкIыщт.
Мэкъу-мэщым ылъэныкъокIэ къэпIон хъумэ, губгъо IофшIэнхэм ом изытет яягъэ екIыщтэп. Псыхъо­хэм адэт псыр шапхъэу щыIэхэм ашIокIыщтэп. Ау мазэм къыкIоцI ощхыр лъэшэу къызещхырэм, псыхъохэм адэт псыр къыдэкIоен ылъэкIыщт.
КIАРЭ Фатим.