БоксымкIэ щытхъум иаллее Краснодар къыщызэIуахыгъ. Къыблэ федеральнэ шъолъырым испортсменхэу гъэхъэгъэшхохэр зиIэхэм ацIэхэр зытетхэгъэ жъогъо 41-рэ урамхэу Старокубанскэмрэ Сормовскэмрэ зыщызэхахьэхэрэм дэжь щагъэпсыгъэ метришъэ зэрылъ чIыпIэм щагъэуцугъэх.

Ахэр Олимпийскэ джэгунхэм, дунаим ыкIи Европэм ащыкIогъэ зэнэкъокъухэм ячемпионых. Джащ фэдэу мыщ къыщыгъэлъэгъуа­гъэх Къыблэ федеральнэ шъолъырым изаслуженнэ тренерхэр ыкIи судьяхэр. Чемпионхэм «яжъогъо аллее» хагъэхьагъ СССР-м спортымкIэ имастерэу, Урысыем ыкIи Адыгеим язаслуженнэ тренерэу Владимир Овчинниковыр.

Аллеим иарт-псэолъэ шъхьаIэр джэрзым хэшIыкIыгъэ скульптурэр ары. Ащ зызыгъэсэнэу кIохэрэ тымрэ ыкъорэ къегъэлъагъох. Тым илъфыгъэ зыфигъазэзэ, ащ тапэкIэ гъэхъагъэхэр зишIыкIэ ыцIэ зытетхэгъэ жъуагъор мы чIыпIэм къыфыщызэIуахын зэралъэкIыщтыр къыфеIуатэ.
МэфэкI Iофтхьабзэм хэлэжьагъэх спортымкIэ заслуженнэ мастерэу Сергей Водопьяновыр, боксер цIэрыIохэу Рахим Чахкиевыр, Софья Очигава, Давид Айрапетян, Дмитрий Пирог ыкIи Къыблэ федеральнэ шъолъырым боксымкIэ и Федерацие ипащэу Дмитрий Кашиныр.
Мыщ фэдэ арт-псэуалъэхэр къэралыгъом инэмыкI шъолъырхэми къащызэIуахыныр, боксым пыщагъэхэм япчъагъэ нахьыбэ шIыгъэныр проектым ипшъэрылъ шъхьаI. Жъуагъо пэпчъ QR-код игъус, ащ ишIуагъэкIэ къыхэбгъэщыгъэ боксерым гъэхъагъэу иIэхэм, къэбарэу пылъым защыбгъэгъозэн плъэкIыщт.