Адыгэ Республикэм культурэмкIэ и Министерствэрэ Лъэпкъ культурэм и Гупчэрэ кIэщакIо зыфэ­хъугъэхэ адыгэ культурэм ифестиваль непэ аублагъ.

Адыгабзэм икъэухъумэн, бзэм ихэгъэхъон, адыгэ шэн-хабзэхэм арыгъуа­зэхэу лIэужыкIэр пIугъэныр, ахэр ныбжьыкIэхэм ягъэшIэгъэнхэр, Адыгеим иIэпэIасэхэм нэIуасэ афэшIыгъэнхэр, лъэпкъ орэд мэкъамэмрэ адыгэ къа­шъомрэ ядэхагъэ алъыгъэIэсыгъэныр, яшIэныгъэ хэгъэхъогъэныр зэхэщакIохэм япшъэрылъ шъхьаI.
Адыгеим, Къэрэщэе-Черкесым, Къэ­бэртэе-Бэлъкъарым, Темыр Осетием — Аланием ыкIи Краснодар краим ятворческэ орэдыIо ыкIи къэшъокIо купхэр мы Iофтхьабзэм хэлажьэх. Зэ­къошныгъэм инэпкъхэр зыгъэпытэщтхэ мэфэкI концертхэр Адыгеим ипсэупIэ зэфэшъхьафхэм къащагъэлъэгъощтых.
Фестивалым иапэрэ мафэ Теуцожь районым ит къуаджэу ПчыхьалIыкъуае культурэм и Унэу дэтым адыгэ мэкъа­мэхэр къезыгъэIорэ народнэ ансамблэу «Насыпымрэ» Краснодар краим къикIыгъэ ансамблэу «Гухэлъ» зыфиIорэмрэ яконцерт щыкIощт.
Шэуджэн районым культурэм и Унэу итым Темыр Осетием — Аланием къи­кIыгъэ ансамблэу «Мэздэгу адыгэхэр», КъБР-м иорэдыIо ансамблэу «Чегем ипсыкъефэххэр», КъЧР-м орэдхэмкIэ инароднэ ансамблэу «Черкесиер» ыкIи Успенскэ районымкIэ чылэу Кургъо­къуае къикIыгъэ купэу «Зих» зыфиIорэм концерт къатыщт.
Адыгэ культурэм, шэн-хабзэхэм якъэ­гъэлъэгъон тегъэпсыхьэгъэ адыгэ культу­рэм ифестиваль иIофшIэн дахэу ­ыублагъ.
Лъэпшъыкъо Фатим.