ЕджапIэхэм ягъэцэкIэжьынкIэ программэу илъэси 5-м телъытагъэм къыхиубытэрэ Iоф­шIэнхэм зарагъэушъомбгъу. Шъугу къэтэгъэкIыжьы мы программэр партиеу «Единэ Россием» къызэрахилъхьэгъагъэр ыкIи Урысыем и Президентэу Владимир Путиным ащ къызэрэдыригъэштагъэр.

БлэкIыгъэ илъэситIум республикэм иеджэпIэ 16-мэ гъэцэкIэжьын IофшIэнхэр федеральнэ мылъкукIэ арашIылIагъэх, ахэм ачIэтыщт мебелыр, доскэхэр, пщэрыхьапIэхэм яоборудование зэблахъугъэх. Мыгъэ еджэпIи 5-мэ япсэолъи 7-мэ гъэцэкIэжьын IофшIэнхэр ащэкIох.
«Адыгэ Республикэм гъэсэныгъэмкIэ ыкIи шIэныгъэмкIэ и Министерствэрэ псэупIэхэм япащэхэмрэ пшъэрылъ афэс­шIыгъ псэолъэшIынымкIэ пIалъэхэр подрядчикхэм амыукъонхэм ашъхьэкIэ гъунэ лъафынэу, джырэ шапхъэхэм адиштэу еджапIэхэр зэтегъэпсыхьэ­гъэнхэм лъыплъэнхэу. Непэ зэшIотхырэ пстэури илъэс пчъагъэкIэ къашъхьапэжьын фае. Техническэ шапхъэхэр къыдэлъытэгъэнхэ, джырэ уахътэм диштэрэ оборудование гъэфедэгъэн зэрэфаеми ар афэгъэхьыгъ», — ритхагъ АР-м и ЛIышъхьэ ителеграм-­канал.