ИлъэсыкIэ еджэгъум ехъулIэу Шэуджэн районым ит еджапIэхэм ачIэхьажьыщтхэм IэпыIэгъу афэхъугъэх.

АР-м IофшIэнымкIэ ыкIи социальнэ хэхъоныгъэмкIэ и Министерствэ къызэрэщаIуагъэмкIэ, илъэс къэс мыщ фэдэ шIушIэ Iофтхьабзэ районым щызэхащэ, щыIэныгъэм чIыпIэ къин ригъэуцогъэ уна­гъохэм IэпыIэгъу афэ­хъух. Ащ ишIуагъэкIэ еджа­пIэм щагъэфедэщт Iэмэ-псымэхэр кIэлэеджа­кIохэм аIэкIагъахьэ. Мы илъэсым кIэлэцIыкIу 33-мэ IэпыIэгъу агъотыгъ.
Iофтхьабзэм кIэщакIо фэхъугъэх Шэуджэн районым щыпсэухэрэм социальнэ IэпыIэгъу ягъэгъотыгъэнымкIэ Зэхэубытэгъэ гупчэм ипащэу ГутIэ Зарэ, район прокуратурэм илIыкIоу, прокурорым игуадзэу МэщлIэкъо Руслъан ыкIи унэгъо МФЦ-м иIофышIэхэр.
Шъугу къэдгъэкIыжьын, «Апэрэ классым кIорэм пае шIухьафтын» зыфи­Iорэм къыдыхэлъытагъэу Iоныгъом и 1-м ехъулIэу еджэнымкIэ къызфагъэфедэщт пкъыгъо зэфэ­шъхьафыбэ зыдэлъ Iалъмэкъ мини 6,7-рэ Адыгеим шагъэхьазырыгъ.
ШIэныгъэм и Мафэ ехъулIэу Адыгеимрэ Ге­ническэ районымрэ якIэлэцIыкIухэу а 1-рэ классым кIощтхэм еджэнымкIэ къызфагъэфедэщт пкъыгъо 20-м ехъу зыдэлъ Iалъмэкъхэр аратыщтых. Ахэм ахэхьэх тетрадьхэр, ручкэхэр, къэлэмхэр, сурэт зыдашIыхьащт альбомхэр, шъо зэфэшъхьаф зиIэ тхылъыпIэхэр ыкIи нэмыкIхэр.