Курскэ, Белгородскэ ыкIи Брянскэ хэкухэм арыт спорт еджапIэхэу теннис цIыкIум фэгъэ­загъэхэм ялIыкIохэр зыхэлэжьэхэрэ егъэджэн-зыгъэсэн Iофтхьабзэхэр Мыекъуапэ щэкIох. Ахэм ягъусэх Адыгэ Республикэм испортсменхэри.

Iофтхьабзэм кIэщакIо фэхъугъэх Урысыемрэ Адыгеимрэ тен­нис цIыкIумкIэ яфедерациехэр, ахэм яIэпыIэгъу Мыекъуапэ физическэ культурэмкIэ ыкIи спортымкIэ и Комитет.
Терроризмэм пэшIуекIорэ операциер зыщыкIорэ шъолъырхэм къаращыгъэ кIэлэцIыкIу 44-рэ непэ республикэм щыI. Ахэм илъэс 12-м щегъэжьагъэу 18-м нэс аныбжь. Спортсмен ныбжьыкIэхэм загъэсэнымкIэ, яфизическэ ухьазырыныгъэ хагъэхъонымкIэ ящыкIагъэр зэкIэ арагъэгъотыгъ. Джащ фэдэу ахэр, пшъа­шъэхэри кIалэхэри, теннис цIыкIумкIэ Адыгэ Республикэм изэ­Iухыгъэ зэнэкъокъу хэлэжьагъэх. Стадионэу «Зэкъошныгъэм», Адыгэ къэралыгъо университетым физическэ культурэмкIэ ыкIи спортымкIэ и Институт мафэм тIогъогогъо, пчэдыжьымрэ пчыхьэмрэ, защагъасэ. КIэлэцIыкIухэм апае культурнэ программэ гъэшIэгъон зэхагъэуцуагъ. Мы мафэхэм ахэр АР-м и Лъэпкъ музей щыIагъэх.

Урысыем теннис цIыкIумкIэ и Федерацие къызэрэщаIуагъэмкIэ, рэхьатныгъэм ылъэныкъокIэ ыпшъэкIэ зигугъу къэтшIыгъэ шъолъырхэм яIофхэм изытет зыпкъ еуцожьыфэ кIэлэцIыкIухэр Адыгеим щагъэIэнхэм фэхьазырых.