Къэралыгъо ыкIи муни­ципальнэ фэIо-фашIэхэр лъэныкъуабэкIэ зыгъэцэкIэрэ Унэгъо гупчэу Мыекъуапэ щылажьэрэм кIэлэцIыкIухэм апае Iофтхьабзэ зэхищагъ.

Ар цIыфхэм социальнэ фэIо-фа­шIэхэр языгъэгъотырэ Зэхэубытэгъэ гупчэм хэхьэ. ШышъхьэIум и 27-м ыпкIэ хэмылъэу къэлэ паркым аттракционхэм кIэлэцIыкIухэр ара­гъэсыгъэх ыкIи гъогурыкIоныр щы­нэгъончъэным фэIорышIэрэ Iофтхьабзэ афызэхащагъ.
Социальнэ IэпыIэгъур зищыкIэгъэ унагъохэм ыкIи сэкъатныгъэ зиIэ кIэлэцIыкIухэм мы Iофтхьабзэр мэфэкI шIухьафтын афэхъугъ. Мы купым хэхьэрэ кIэлэцIыкIухэм загъэ­псэфын, жьы къабзэ къащэн, къэлэ паркым щыджэгунхэ амал яIэныр зэхэщакIохэм къыдалъытагъ.
— КIэлэцIыкIу сымаджэхэм ыкIи сабыибэ зэрыс унагъохэм ящыкIэгъэ IэпыIэгъур ядгъэгъотыныр пшъэ­рылъ шъхьаIэу Адыгеим и ЛIышъхьэу КъумпIыл Мурат къытфегъэуцу. Унагъохэм ящыкIэгъэ медицинэ, психологическэ, педагогическэ, юриди­ческэ, социальнэ IэпыIэгъур шIуагъэ къытэу зы чIыпIэм ащыфызэхэщэ­гъэ­ныр гупчэм ипшъэрылъ шъхьаIэхэм ащыщ. А Iофыгъо пстэум язэшIохын гупчэм щылэжьэрэ нэбгырэ 13 дэлажьэ. Къэлэ паркыр хьакIэ цIыкIумэ фабэу къапэгъокIыгъ. ШIушIэ IэпыIэгъу къытфэхъугъэхэм лъэшэу тафэраз, — къыIуагъ сэкъатныгъэ зиIэ сабыйхэм Iоф адэзышIэрэ специа­листэу Блэгъожъ Иринэ.
АР-м IофшIэнымкIэ ыкIи со­циальнэ хэхъоныгъэмкIэ иминистрэу Мыр­зэ Джанбэч лъэныкъо зэфэшъ­хьаф­хэмкIэ къэралыгъо ыкIи муни­ци­пальнэ фэIо-фашIэхэр зыгъэцэкIэрэ Унэгъо гупчэм иIофшIэн зэ-
рэзэ­хищэрэм ынаIэ тет. КIэлэцIы-кIухэр зэрыс унагъохэм япсэукIэ амал­хэр нахьышIу шIыгъэным гуп-
чэр фэ­IорышIэ. КъяуалIэхэрэм шап­хъэхэм атетэу социальнэ IэпыIэгъу арагъэгъотыным, япшъэрылъхэр зэрифэ­шъуашэу агъэцэкIэнхэм мыщ иIофы­шIэхэр пылъых.

Iофтхьабзэм пэублэ фэхъугъ гъогуры­кIоныр щынэгъончъэным фэIорышIэрэ десэу АР-м хэгъэгу кIоцI IофхэмкIэ и Министерствэ и Къэралыгъо автоинспекцие иинспектор шъхьаIэу, майорэу ЖэнэлI Сусанэ зэхищагъэр.
— Непэ пшъэрылъэу тиIэр сабыйхэмкIэ гъогурыкIоныр щынэгъончъэу щытыным фэIорышIэрэ лъэныкъохэмкIэ гъэсэныгъэм иучреждениехэм яIофшIэн агъэлъэшыныр, гъогум узэрэщызекIон фэе шапхъэу щыIэхэм кIэлэцIыкIухэр ыкIи ны-тыхэр икъоу ащыгъэгъозэгъэнхэр, псауныгъэм зэрар езыхырэ шIыкIэхэр щыгъэзыегъэнхэм фэшI пэшIо­рыгъэшъ Iофтхьабзэхэр зэхэщэгъэнхэр ары. Iоныгъом кIэлэцIыкIухэр еджапIэмэ ачIэхьажьыщтых. ГъогурыкIоныр щы­нэгъончъэным, урамым узэрэщызекIощтым апылъ шапхъэхэр ахэм джыри зэ агу къэдгъэкIыжьыгъ, — къыIуагъ Жэ­нэлI Сусанэ.
Сэкъатныгъэ зиIэ кIэлэцIыкIоу Семен Ворошиловым янэу Юле къыIотагъ: «Непэрэ мафэр тэркIэ мэфэкI хъугъэ, лъэныкъо зэфэшъхьафхэмкIэ гупчэм зэхищэрэ Iофтхьабзэр лъэшэу къытшъхьапэх».
Зэхахьэм къекIолIэгъэ илъэсих зыныбжь Расул къыIуагъ: «Хъэренэм сисыныр лъэшэу сикIас. Мыщ ыпэкIэ мэ­фэкIэу тиIагъэм ныбджэгъу къысфэ­хъугъэ Каринэ непэ къызэрыкIуагъэм лъэшэу сигъэгушIуагъ. ЕджапIэу сызчIэхьащтым ар къыздычIэхьаным сыкIэхъопсы».
— Лъэныкъо зэфэшъхьафхэмкIэ кIэлэ­цIыкIухэм хэхъоныгъэ ашIынымкIэ, сэнаущыгъэу ахэлъыр къызэIуахынымкIэ мы гупчэм щылажьэхэрэм Iофышхо агъэцакIэ. Пшъэрылъ шъхьаIэр унагъом щарагъэгъотырэ пIуныгъэм хэгъэхъогъэ­ныр, зипсауныгъэ пыч фэхъугъэ кIэлэцIыкIухэр, сабый ибэхэр е зянэ-зятэ зышъхьащымытыжьхэр щыIэныгъэм хэ­гъэгъозэгъэнхэр ары. ТапэкIи тиIоф зэрифэшъуашэу дгъэцэкIэщт, — къы­Iуагъ гупчэм ипсихологэу Нина ­Топник.
Социальнэ IэпыIэгъу зищыкIэгъэ унагъохэм ыкIи сэкъатныгъэ зиIэ кIэлэ­цIыкIухэр зэрысхэм щыкIагъэу яIэхэм къыпкъырыкIызэ, непэрэ лъэхъаным амалэу къытыхэрэм адиштэу социальнэ фэIо-фашIэхэр афэгъэцэкIэгъэнхэм Гуп­чэр дэлажьэ.
Лъэпшъыкъо Фатим.